«Գլոբալիզացիայի եւ տարածաշրջանային համագործակցություն» հասարակական կազմակերպության ղեկավար, քաղաքագետ Ստեփան Գրիգորյանը Հայաստանի առջեւ կանգնած հիմնական մարտահրավերներից է համարում ԵՄ-ում ճգնաժամը: «Այն լուրջ է նաեւ միգրանտների հետ կապված: Ու այն մեր շահի հետ է կապված, քանի որ Հայաստանի գլխավոր «հովանավորը» ԵՄ-ն է, մասամբ նաեւ ԱՄՆ-ը»,- այսօր «Հայացք» մամուլի ակումբում իր կարծիքը բարձրաձայնեց քաղաքագետը:
Նա ոչ պակաս մարտահրավեր է համարում ՌԴ-ում խորացող տնտեսական, Թուրքիայում եւ Ադրբեջանում ներքին ճգնաժամերը: «Մարդու իրավունքների, սոցիալ-տնտեսական խնդիրները Ադրբեջանում կարող են անդրադառնալ ԼՂՀ հարցի վրա`այդ ճգնաժամը պատերազմով կոմպենսացնելով»,- ասաց նա:
Քաղաքագետը զարմացած է. Ուկրաինայի համար, որի հետ ՌԴ-ն պատերազմի մեջ է, ավելի էժան է գազի գինը`100 խորանարդ մետրի համար 200 դոլար, մինչդեռ Հայաստանը 280 դոլարով է գազ գնում իր ռազմավարական գործընկերոջից:
«Շատ լավ է, որ կառավարությունը դիմել է «Գազպրոմին»`գազի գինը իջեցնելու համար, բայց դա պետք է առնվազն երկու ամիս առաջ արված լիներ, երբ ձեւավորվեց նավթի գների անկման միտումը: Մենք պետք է սովորենք արագ արձագանքել այդ հարցերին: ԵՄ-ի հետ բանակցությունները վերսկսվեցին, հիմա խոսում են մեկ տարվա մասին, երբ երեք ամսում կարելի է փաստաթուղթ ստորագրել: Պայմանագիրը պատրաստ է, դրանից ազատ առեւտրին վերաբերվող մի քանի կետեր պիտի հանել: Արագ պետք է արձագանքել իրավիճակին: Փաստ է, որ ռուսական շուկան փակվեց: Քաղաքական պատասխանատվության հարց կա, ո՞ւր են այն մարդիկ, ովքեր երկու ձեռքով կողմ էին ԵՏՄ-ին: «Գազպրոմին» դիմելը, ԵՄ-ի հետ բանակցությունների վերսկսումը ցույց տվեց, որ ԵԱՏՄ մտնելը սխալ էր: Հիմա պետք է արագ անել ամեն ինչ, ինչի՞ են սպասում կամ ձգձգում: Մոտ ժամանակներս նոր մարտահրավերներ կծնվեն: Պետք է սովորենք ՌԴ-ի հետ աշխատել, ես չեմ կարծում, որ այդքան վատ է մեր սուվերենության հարցը: ՌԴ-ի ազդեցությունը մեծ է, ես համաձայն եմ, բայց պետք է աշխատել այդ երկրի հետ, բացատրել, հասկացնել եւ այլընտրանք ստեղծել»,- իր վրդովմունքը հայտնեց քաղաքագետը:
Կարդացեք նաև
Նելլի ԳՐԻԳՈՐՅԱՆ
