«Վտանգավոր իրավախախտների մասին հաղորդագրությունը ընդհանուր է ամբողջ Եվրոպայում»,- Aravot.am-ի հետ զրույցում ասաց քրեական օրենքի պրոֆեսոր Կարլոս Մարիա Ռոմեո-Կասաբոնան:
Ըստ նրա, դրա նպատակը իրավունքները ներդաշնակեցնելն է, որպեսզի բոլոր երկրներում նույնանման արդյունքներ գրանցվեն: Նա համարում է, որ դա կնպաստի համագործակցությանը, օրինակ՝ այնպիսի դեպքերում, ինչպիսին է արտահանձնումը, ոստիկանական եւ իրավական համագործակցությունը:
«Եվրոպայի խորհրդի կարեւոր մտահոգությունն է հարգել մարդու իրավունքները եւ ազատությունները՝ ներառյալ հանցագործներինը: Այսպիսով՝ հեշտ չէ պայքարել եւ կանխարգելել հանցագործությունները եւ միեւնույն ժամանակ հարգել իրավախախտների իրավունքները»,- ասաց Ռոմեո-Կասաբոնան:
Խոսելով նախնական կալանքի մասին՝ Կարլոս Մարիա Ռոմեո-Կասաբոնան ասաց, որ իր կարծիքով՝ դա ծայրահեղ գործիք է, որը կարող է օգտագործվել բացառիկ դեպքերում. «Ի նկատի ունեմ շատ-շատ ծանր հանցագործությունները, ոչ թե երբ ռիսկի գնահատականը պարզ չէ: Պետք է առարկայական ապացույցներ լինեն, որ իրավախախտը կրկին նման հանցագործություններ կգործի: Ես չեմ կարծում, որ դա որպես լուծում կարող է կիրառվել բոլոր վտանգավոր իրավախախտների համար, միայն այն բացառիկ անձանց համար, ում համար պատժամիջոցը լուծում չէ, որովհետեւ դա նրանց չի մտահոգում: Բայց այդ դեպքերում մենք հնարավորություն ունենք անհրաժեշտ միջոցները կիրառել նրանց նկատմամբ, ինչի կարիքը նրանք ունեն: Այս միջոցառումների վտանգն այն է, որ քաղաքական գործիչները կարծում են, որ լուծումը նրանց բոլորին բանտ ուղարկել եւ նրանց մասին մոռանալն է: Սա լուծում չէ: Մեզ թույլատրված չէ մոռանալ, որ նրանք դեռ քաղաքացիներ են: Բայց նրանք հանցագործություն են գործել, շատ ծանր հանցագործություն, այսպիսով՝ մենք պետք է նաեւ պաշտպանենք մեզ»:
Կարդացեք նաև
Հարցին, թե ուսումնասիրե՞լ է Հայաստանի փորձը, Կարլոս Մարիա Ռոմեո-Կասաբոնան պատասխանեց՝ ոչ, բայց կարծում է, որ Հայաստանը որպես Եվրոպայի խորհրդի անդամ երկիր պետք է հարգի Մարդու իրավունքների եւ հիմնարար ազատությունների եվրոպական կոնվենցիան, ինչպես յուրաքանչյուր եվրոպական երկիր:
Ամի ՉԻՉԱԿՅԱՆ
