Աղետներին պատշաճ կերպով պատրաստված լինելը կարեւոր է, քանի որ ռիսկերը չեն կարող ամբողջությամբ վերացվել կամ նվազեցվել: Այսօր «Երեւան Պլազայում» կազմակերպված «Հայաստանի աղետների ռիսկի կառավարման ազգային ծրագրի» ներկայացման ժամանակ ասաց աղետների ռիսկի կառավարման մասնագետ Կո Տակեուչին: Նա մեր մասնագետներին խորհուրդ կտա, թե ինչպես ֆինանսապես պատրաստ լինել աղետներին տարբեր մակարդակներում:
Ծրագրի նպատակն է աջակցել ՀՀ կառավարությանը, որպեսզի նա կրճատի աղետների ռիսկը: Կո Տակեուչին ճապոնիայից է եւ աղետների ռիսկի առումով մի շարք ընդհանրություններ է տեսնում մեր երկրի հետ: Ըստ նրա, Ճապոնիան փորձում է «լուրջ դասեր քաղել աղետներից»:
1,7 միլիոն դոլար արժողությամբ ծրագրի իրականացման ժամկետը 2015-2017 թթ. է: Գումարներն ուղղվելու են կարողությունների զարգացմանը, տեխնիկական աջակցությանը: Ծրագիրն իրականացվում է Համաշխարհային բանկի, Ճապոնիայի կառավարության եւ այլ դոնոր կազմակերպությունների միջոցներով:
Միջոցառման մասնակիցները կարծիք հայտնեցին, որ ռիսկերի կառավարման վերաբերյալ գիտելիքները պետք է սկսել դպրոցից եւ, դրանով էլ պայմանավորված, կրթական համակարգում բարեփոխումներ անել:
Կարդացեք նաև
Տարածքային կառավարման եւ արտակարգ իրավիճակների նախարարության ներկայացուցիչ Նիկոլայ Գրիգորյանի խոսքերով, աղետների ռիսկի նվազեցման համար ֆինանսավորումը ոչ թե ծախս է, այլ` ներդրում. «Հարուստ պետությունները աղետների ռիսկի նվազեցման ոլորտում խոշոր ներդրումներ են անում, իսկ զարգացող երկրները եւ շատ երկրներ, մինչեւ դանակը ոսկորին չի հասնում, սոսկ արձագանքման գործողություններ են ձեռնարկում»:
Ըստ Նիկոլայ Գրիգորյանի, մեր երկիրը ե’ւ բնական վտանգներ ե’ւ տեխնածին վտանգների ե’ւ համաճարակային ե’ւ բնապահպանական ե’ւ քաղպաշտպանական վտանգների առումով խոցելի է. «Մեր երկիրն այս բոլոր ուղղություններով ծրագրերը դասակարգում է եւ ռիսկի նվազեցման միջոցառումներ է մշակում»:
Պարոն Գրիգորյանը նաեւ ասաց, որ մեր երկրի համար կարեւոր ուղղություն է շենքերի սեյսմիկ վիճակը, դպրոցների շենքերի սեյսմակայունության հարցը:
Լուսինե ԲՈՒԴԱՂՅԱՆ
