«ԵԽԽՎ-ն ազատ հարթակ է, ադրբեջանական լոբբինգն աշխատում է բավականին հայտնի մեթոդներով: Չեմ բացառում, որ կոնկրետ մարդկանց, կոնկրետ պատգամավորների կարելի է ազդեցության տակ գցել»,- այսօր «Հենարան» ակումբում խոսելով ԵԽԽՎ-ում քննարկվելիք հակահայկական բանաձեւերի մասին՝ այսպիսի կարծիք հայտնեց ԲՀԿ պատգամավոր, ԵԽԽՎ հայկական պատվիրակության անդամ Վահան Բաբայանը:
Նրա խոսքերով՝ «Պատահական չի, որ Ռոբերտ Ուոլթերին ՀՀ իշխանությունները 4 անգամ հրավիրել են ՀՀ, բայց նա 4 անգամ էլ խուսափել է գալ ՀՀ, ԼՂՀ, փոխարենը՝ երկու անգամ այցելել է Ադրբեջան: Բայց ես ասացի՝ անհնար է զեկույց գրել մի բանի մասին, որը չես տեսել օրինակ՝ Սարսանգի ջրամբարը: Իրենք օգտվել են Google-ի տվյալներից եւ դրա քարտեզներից: Երբվանի՞ց Google-ը կարող է դեր խաղալ միջազգային հարցեր լուծելու համար: Խոսելով Սարսանգի մասին՝ մարդիկ այցելում են Բաքու, ձեւակերպումների մեջ էլ չեն հասկանում ինչ արտահայտություններ են անում»:
Վահան Բաբայանն ասաց, որ ԵԽԽՎ-ում հայկական կողմին սպասվում է ծանր աշխատանք, բայց թե ինչ են անելու, փակագծերը չբացեց՝ չի ուզում մեր հակառակորդներին ինֆորմացիա տալ:
Aravot.am-ի հարցին՝ ՀԱԿ խմբակցության ղեկավար Լեւոն Զուրաբյանը գտնում է, որ հայկական պատվիրակության անդամները երբեմն սխալ մարտավարություն են ընտրում՝ հայհոյելով ադրբեջանցիներին, ինչը թույլ է տալիս ֆեյսբուքում լայքեր հավաքել, արժանանալ մի խումբ ազգայնամոլների ծափահարություններին, բայց իրականում պետք է կենտրոնանալ զեկույցների վրա, հայհոյելը արդյունք չի տալիս, համաձա՞յն եք այդ տեսակետի հետ՝ Վահան Բաբայանը պատասխանեց. «Հայկական պատվիրակությունը չի կարող ձեռքերը ծալած նստել, երբ նստաշրջանի ժամանակ ադրբեջանցի գործընկեր պատգամավորները անիմաստ վարկաբեկող արտահայտություններ են անում ու աղավաղում ԼՂՀ հիմնախնդիրը: Պետություն, որը չունի դեմոկրատական որեւէ արժեք, ՀՀ-ն ներկայացնում է որպես ագրեսոր երկիր: Ինչ եք կարծում, հայկական կողմը պետք է դրան պատասխան չտա եւ կենտրոնանա զեկույցի վրա՞: Ադրբեջանցիներին պատասխանելը չեմ կարծում , որ միայն արվում է ազգայնամոլներին դուր գալու համար: Դա մեր ազգային արժանապատվությունն է, իրավունք չունենք մենք սակարկման առարկա դարձնել մեր պետության հեղինակությունը»:
Կարդացեք նաև
Մեր հարցին՝ Դուք Էդվարդ Նալբանդյանի աշխատանքն ինչպես եք գնահատում, շատերը նրան մեղադրում են անգործության մեջ՝ նա պատասխանեց. «Չեմ ուզենա անձերին գնահատական տալ, կոռեկտ չէ: Ես մեկ տարի է՝ ԵԽԽՎ պատվիրակության անդամ եմ, տեսել եմ մեր դիվանագիտական կորպուսի աշխատանքը, չեմ կարող վատ գնահատել, բայց ասել, որ ամեն ինչ կատարյալ է եւ իդեալական՝ դա էլ չեմ կարող»:
Հռիփսիմե ՋԵԲԵՋՅԱՆ
