Նախկին պատգամավոր, գործարար Խաչատուր Սուքիասյանը քաղաքական դաշտ իր վերադարձը 50/50 է համարում: Ըստ նրա, նախ եւ առաջ պետք է ուսումնասիրել դաշտը, եթե օրինականության համար նախապայմաններ լինեն, ապա դա քաղաքական դաշտ մտնելու ցանկություն կառաջացնի:
«Ես կարծում եմ՝ որոշակի սերնդափոխություն է պետք անել: Նոր ձեւաչափը, նոր կարգավիճակ, նոր խումբ, նոր պատկերացումներ, նոր առաջարկ, նոր պահանջ, այս ամեն ինչը պետք է, որովհետեւ ինքը բավականին հնացած է ընդհանուր դաշտը, այս մայթից մյուս մայթ են թռչում, այն մայթից մյուս մայթ են թռչում, սա պետք է նույնպես կարգավորվի: Կարծում եմ՝ ժամանակն է պահանջներ դրվեն: Արեւմտյան չափորոշիչներով քաղաքականությունը այն է, որ եթե ցանկացած քաղաքական գործիչ, ցանկացած կուսակցության ղեկավար տարիների ընթացքում կամ ինչ-որ մի պահ կամ ինչ-որ մի հարցում գլոբալ սխալ է կատարում, ամբիոնի մոտ կանգնում է, ներողություն է խնդրում, հեռանում է քաղաքական դաշտից: Հայաստանում ինչ ուզում է լինի, ուզում է օդ թռչի, ուզում է ամենավատ գործողությունները այդ քաղաքական համակարգը թույլ տա, ասում են՝ ի՞նչ է եղել որ»,- ասաց նա:
Խաչատուր Սուքիասյանը համարում է, որ հասարակությունը պետք է այդ պահանջը դնի, եւ հասարակությունը իր մեղքի բաժինն ունի այն հարցում, որ արատավոր երեւույթներ կան եւ նոր հարթակ ձեւավորված չէ: Նա համարում է, որ անհրաժեշտ է այդ նոր հարթակի ձեւավորումը. «Նախկինում, կարծում եմ, այդտեղ ինչ-որ բաներ կային խանգարված կամ ոչ այդքան մեր հասարակությանը պիտանի: Ինստիտուցիոնալ ճանապարհ է պետք, եւ որակը պետք է ինչ-որ մակարդակի բարձրացվի: Քաղաքական գործիչ գիտեմ (անունը չեմ տալու), 6 անգամ տարբեր տեղեր պտտվել է, տարբեր հարթակներում եղել է, նման բան չկա աշխարհում՝ մերժում են, ասում են՝ ցտեսություն ձեզ: Արեւմուտքում լավ բան կա, որը բավականին լավ գործիք է հասարակության համար՝ բոյկոտի գործիքն է՝ քաղաքական համակարգին բոյկոտում են, մերժում են, հրաժարվում են եւ ապրանքից էլ են հրաժարվում են, եթե տեսնում են ծագումը՝ հարկ վճարած ապրանք չի, այդ ծառայությունը պետության նկատմամբ իր պարտականությունները չի կատարում, ծառայությանն էլ են բոյկոտում»:
Ամի ՉԻՉԱԿՅԱՆ
