Երեկ կեսօրին Լոնդոնի ֆոնդային բորսայում բրենդ տեսակի նավթի մեկ բարելի գինը նվազելով հատեց 30 դոլարի հոգեբանական շեմը: Մի քանի տատանումներից հետո երեկոյան նավթի գինը կայունացավ 29 դոլարի ցուցանիշի շուրջ:
Նավթի գնի նվազմանը արագ արձագանքելով արժեզրկվեց նաեւ ռուսական ռուբլին: Երեկ երեկոյան Մոսկվայի բորսայում մեկ դոլարն արդեն գնահատվում է 77.5 ռուբլուց ավելի: Սա մեծ ազդեցություն է թողնում մեզ վրա, քանի որ Հայաստանի բնակչության եկամուտները մեծապես կախված են Ռուսաստանից ուղարկվող մասնավոր տրանսֆերտների ծավալից, իսկ ռուբլու արժեզրկմանը համահունչ նվազում է նաեւ տրանսֆերտների ծավալը:
Տրանսֆերտների ծավալը հզոր ազդեցություն ունի հայկական դրամի փոխարժեքի վրա: Սակայն ռուբլու շարունակական արժեզրկումը վերջին շրջանում ոչ մի ազդեցություն չի գործում դրամի փոխարժեքի վրա: Այն որ դրամը նախանձելի անտարբերություն է դրսեւորում ռուսական ռուբլու արժեզրկման նկատմամբ եւ չի արժեզրկվում, դա իհարկե լավ է, սակայն խիստ կասկածելի: Շատ տնտեսագետների համոզմամբ վերջին շրջանում դրամի փոխարժեքի կայունությունը պահպանվում է արհեստականորեն, ինչը վաղ թե ուշ կարող է թռիչքային փոփոխության պատճառ դառնալ:
Հրապարակումն ամբողջությամբ՝ «Հայկական ժամանակ» թերթի այսօրվա համարում:
