Վաղը Կենտրոն եւ Նորք Մարաշ վարչական շրջանների դատարանում կքննարկվի «Հայրենիք ու պատիվ» կուսակցության նախագահ Գառնիկ Մարգարյանի խափանման միջոցի հարցը:
Գառնիկ Մարգարյանի շահերի պաշտպան Հովիկ Արսենյանի խոսքով, իր պաշտպանյալը ցուցմունք է տվել եւ պատմել, Արթուր Վարդանյանն իրեն զանգահարել է, հանդիպման կանչել. «Մի քանի հանդիպում է եղել, որի ժամանակ խոսել են արտաքին քաղաքական հարցերի շուրջ, հեղաշրջման կամ ահաբեկչությունների հետ կապված բացարձակապես խոսք չի գնացել»:
Փաստաբանի խոսքով, Գառնիկ Մարգարյանը ժխտել է, թե ինքը զենք կամ զինատեսակ է տրամադրել Արթուր Վարդանյանին կամ որեւէ այլ անձի:
Մեր հարցին, իր պաշտպանյալը պատմե՞լ է , թե որտեղից է ճանաչել Արթուր Վարդանյանին, ինչ հարաբերությունների մեջ է եղել նրա հետ, փաստաբանն ասաց. «Ավելին չեմ կարող ասել»:
Կարդացեք նաև
Ըստ ԱԱԾ-ի, Գառնիկ Մարգարյանը կասկածվում է Արթուր Վարդանյանի կողմից ստեղծված հանցավոր համագործակցությանը մասնակցելու, կազմակերպված խմբի կազմում զենք և ռազմամթերք իրացնելու, պահելու մեջ, նախատեսված՝ ՀՀ քրեական օրենսգրքի 223-րդ հոդվածի 2-րդ մասով և 235-րդ հոդվածի 3-րդ մասով: «Վերոհիշյալ անձանց բնակարաններում և «Եղվարդի մարզակոշիկների ֆաբրիկա» ԲԲ ընկերությունում իրականացվել են խուզարկություններ, ձեռնարկվում են բոլոր անհրաժեշտ միջոցառումները գործի լրիվությունը, բազմակողմանիությունը և օբյեկտիվությունն ապահովելու համար: Նախաքննությունը շարունակվում է»,- ասված է ԱԱԾ հաղորդագրության մեջ:
Արփինե ՍԻՄՈՆՅԱՆ
