Քիչ առաջ Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը կարդաց Հայ ազգային կոնգրես կուսակցության անդամ Վարդան Հարությունյանին կաշառել փորձելու գործով իր վճիռը:
Հիշեցնենք, որ Զավեն Միրիջանյանին մեղադրանք էր առաջադրվել հանրորեն վտանգավոր արարքի` ՀՀ Սահմանադրության փոփոխությունների 2015թ. դեկտեմբերի 6-ին կայանալիք ՀՀ քաղաքացիների հանրաքվեի իրավունքի և հանրաքվեի տեղամասային հանձնաժողովի անդամի լիազորությունների ազատ իրականացմանը նյութապես շահագրգռելով խոչընդոտելու համար:
Դատավորը որոշեց, որ այն 100 հազար դրամը, որը Զավեն Միրիջանյանը որպես կաշառք առաջարկել էր տալ ՀԱԿ անդամին, բռնագանձել հօգուտ պետության, նշանակել 2 տարի փորձաշրջան՝ նրան անհապաղ ազատ արձակելով դատարանի դահլիճից:
Զավեն Միրիջանյանի պաշտպանը նշել էր, թե որքան ծանր առողջական վիճակում է ամբաստանյալը, նրա ընտանիքի անդամները հիվանդ են, նա տան միակ կերակրողն է: Դատավորը նշեց, որ իր վճիռը կայացնելիս հաշվի է առել այն, որ Զավեն Միրիջանյանը առողջական խնդիրներ ունի եւ ընտանիքի անդամները նույնպես առողջ չեն:
Կարդացեք նաև
Դատական նիստից հետո Զավեն Միրիջանյանը լրագրողների որեւէ հարցի չպատասխանեց, նա չասաց՝ գո՞հ է այս վճռից, շարունակելո՞ւ է աշխատել Կենտրոնի թաղապետարանում:
Հռիփսիմե ՋԵԲԵՋՅԱՆ
