Քաղաքագետ Սերգեյ Մինասյանը չի բացառում, որ Ադրբեջանը, երկրի ներսում գոյություն ունեցող խնդիրներից ուշադրություն շեղելու համար սահմանին վերսկսի ռազմական գործողությունները:
Մյուս կողմից «Զարկերակ» մամուլի ակումբում քաղաքագետը կասկածի տակ դրեց` արդյոք Իլհամ Ալիևը կգնա՞ լայնամասշտաբ ռազմական գործողությունների` պատերազմի վերսկսման` հաշվի առնելով այն հանգամանքը, որ ռիսկերն այս պահին ավելի մեծ են, քան նախորդ ամիսներին:
Պարոն Մինասյանն այս առիթով մանրամասնեց. «Վերջին մի քանի շաբաթների ընթացքում Իլհամ Ալիևի դիրքերը սեփական երկրի ներսում չափազանց թուլացել են: Այս իրավիճակում նա միգուցե չի հրաժարվի ռազմական գործողությունների ակտիվությունը պահպանելուց, բայց մյուս կողմից հարց է` արդյոք կդիմի՞ լայնամասշտաբ ռազմական գործողությունների: Արդյոք այս պարագայում նա ի վիճակի կլինի՞ ռիսկի դիմել ու գնալ այդ քայլի`հիշելով, թե ինչ քաղաքական զարգացումներ են եղել Ադրբեջանում այս իրավիճակում, երբ ղեկավարները կորցրել են իրենց պաշտոնները»:
Տաթև ՀԱՐՈՒԹՅՈՒՆՅԱՆ
