«Զվարթնոց» օդանավակայանի հեղինակային իրավունքի իրավատեր, ճարտարապետ Անահիտ Թարխանյանն այսօր «Հայացք» մամուլի ակումբում լրագրողներին հայտնեց, որ նամակով դիմել է Քաղաքաշինության նախարարություն՝ խնդրելով պարզաբանել՝ արդյոք «Զվարթնոց» օդանավակայանի հին համալիրի էստակադան ապամոնտաժելու քաղաքապետի թույլտվությունն օրինական է եւ արդյոք թույլտվություն տրամադրելու հետեւանքով չի վտանգվում համալիրն ամբողջությամբ: Նախարարությունից պատասխանել են, որ դիմումը մուտքագրվել է աշխատակազմ:
Ավելի վաղ ճարտարապետները մտահոգություն էին հայտնել, որ «Զվարթնոց» օդանավակայանի հին համալիրի էստակադան ապամոնտաժելու որոշումը հիմքեր չունի եւ մասնագիտական քննարկումներ չեն կազմակերպվել: Անահիտ Թարխանյանի պնդմամբ՝ ապամոնտաժման թույլտվությունը տրվել է առանց նախագծային փաստաթղթերի, իսկ էստակադան կարեւոր նշանակություն ունի շինության համար. «Էստակադան իրենից ներկայացնում է օդանավակայանի սիրտը, որն աշտարակը միացնում է ներքին եւ արտաքին օղակների հետ»:
Ճարտարապետը հիշեցրեց, որ «Զվարթնոց»-ը ռազմավարական նշանակություն ունի Հայաստանի համար եւ դա հաշվի չառնելն անընդունելի է. «Եթե վաղը սեփականատերը որոշի վաճառել նոր օդանավակայանը, ո՞վ կգնի: Տարածաշրջանում կան պետություններ, որոնք կուզենան գնել այն, հասկանո՞ւմ եք՝ ինչի մասին է խոսքը: Սա ենթադրություն է, բայց ապագան պետք է հաշվի առնել: Մեկը կարող է գնել օդանավակայանը, փակել, եւ մենք չենք ունենա օդանավակայան: Հիշենք, որ 20 տարի առաջ Հայաստանին շրջափակումից փրկեց «Զվարթնոցը»:
Անահիտ Թարխանյանին հարցրինք, թե արդյոք «Զվարթնոցն» ունի սեյսմակայունության խնդիր, որի պատճառով էլ կոնցեսիոները հրաժարվում է վերականգնման հսկայական գումարը ներդնել: «Ըստ «Հայնախագիծ» ինստիտուտի ինժեներների՝ մեկ տարի առաջ կատարած հաշվարկների՝ ժամանակին օդանավակայանը նախագծվել է բարձր սեյսմիկ կայունության նորմերին համապատասխան: Եվ դա պարզ է, որովհետեւ այն նախագծվել է որպես ռազմավարական նշանակության օբյեկտ: Ուստի օդանավակայանի կառույցներն այսօր էլ համապատասխանում են օրենսդրական նորմերին»,-ասաց Անահիտ Թարխանյանը:
Կարդացեք նաև
Բանախոսի համոզմամբ՝ շատ հայրենակիցներ անգնահատելի ներդրումներ են կատարել, բայց «Զվարթնոցի» եւ մի շարք այլ դեպքերում անընդունելի է կառույցը քանդելու հաշվին մեկ այլ շենք կառուցելը:
Թարխանյանը կոնցեսիոներին առաջարկում է օդանավակայանը հետ հանձնել պետությանը, քանի որ 10 տարուց ավելի է՝ չի կարողանում շարունակել շահագործումը. «Եթե ապամոնտաժում են, ուրեմն այլ նպատակներ կան»,-եզրափակեց ճարտարապետը:
Լուիզա ՍՈՒՔԻԱՍՅԱՆ
