Հայաստանում բազմաթիվ ապրանքների գներ նվազել են: Այսօր կառավարության նիստում հայտարարեց վարչապետ Հովիկ Աբրահամյանը: Նա տնտեսական մրցակցության պաշտպանության պետական հանձնաժողովի նախագահ Արտակ Շաբոյանին հորդորեց ներկայացնել գնանկման մասին տեղեկատվությունը: Արտակ Շաբոյանը տեղեկացրեց, որ հանձնաժողովը նախորդ տարեվերջին խիստ վերահսկողություն է իրականացրել մի շարք շուկաներում, նպատակն է եղել թույլ չտալ, որպեսզի գերիշխող դիրք զբաղեցնողները գների անհիմն թանկացումներ իրականացնեն:
Ըստ պարոն Շաբոյանի, ուսումնասիրություններ են իրականացվել մոտ 20 ապրանքների գծով, դրանք այն ապրանքներն են, որոնք սոցիալական նշանակություն ունեն և ներմուծվում կամ արտադրվում են գերիշխող դիրք ունեցող ընկերությունների կողմից: Ըստ ՏՄՊՊՀ ղեկավարի, խոսքը վերաբերում է շաքարավազին, կաթնամթերքին, կարագին, ձեթին, ձավարեղենին, հավի մսին, ձվին:
Վարչապետ Հովիկ Աբրահամյանը հավելեց՝ ալյուրին:
«Այո՝ ալյուրը, ցորենը, ցանկում ընդգրկվել է նաեւ բենզինը, ավտոգազը: Բոլոր այդ ապրանքների գծով Ամանորի նախաշեմին գների աճ չի արձանագրվել, ավելին, որոշ ապրանքատեսակների գծով տարվա ընթացքում գների էական նվազում է արձանագրվել: Մասնավորապես, ալյուրի գները տարվա կտրվածքով նվազել են մինչեւ 30 տոկոսով: Սա մեծ չափով պայմանավորված է ռուսական ռուբլու արժեզրկմամբ, քանի որ ալյուրն ու ցորենը ներկրվում է ՌԴ-ից»,- պարզաբանեց Արտակ Շաբոյանը:
Կարդացեք նաև
Հովիկ Աբրահամյանը հետաքրքրվեց՝ եթե ալյուրի գինը 30 տոկոսով նվազել է, ինչո՞ւ հացի գները չեն նվազում: Ի պատասխան պարոն Շաբոյանն ասաց, որ հացի գների անկում արձանագրել են:
«Բայց ոչ 30 տոկոսի չափով»,-նկատեց Հովիկ Աբրահամյանը:
Արտակ Շաբոյանը տեղեկացրեց, որ հացի արտադրության ոլորտում կան հարյուրավոր ու հազարավոր տնտեսավարողներ, դաշտը մրցակցային է, հակամրցակցային համաձայնություններ չեն կարող այս դաշտում լինել: «Ես առաջարկում եմ հարյուր հազարների հետ գործ չունենալ, մինչեւ մեկ տասնյակ խոշորներին եւս մեկ անգամ ուսումնասիրել, հասկանալ ինչու հավասարաչափ չեն իջեցվել հացի գները»,- ասաց վարչապետը:
Լուսինե ԲՈՒԴԱՂՅԱՆ
