Սուր շնչառական հիվանդությունից այսօր մահվան դեպք է գրանցվել նաեւ «Սուրբ Գրիգոր Լուսավորիչ» հիվանդանոցում: Մահացածը հղի է եղել, որին միացված է եղել արհեստական շնչառական սարքը:
Հիվանդանոցի բուժգծով տեղակալ Ռուբեն Օրգուսյանն Aravot.am-ին տեղեկացրեց, որ կեսարյան հատման միջոցով երեխայի կյանքը փրկել են: Իսկ թե հղիի մոտ H1N1 վարակ եղել է, թե՝ ոչ, պարզ կլինի վաղը:
Այս հղի կնոջ մահվան դեպքի մասին առողջապահության նախարարությունը որեւէ հաղորդագրություն եւ տեղեկություն չի հայտնում: Ընդ որում, նախարարությունը լրագրողներին հորդորել է հիմնվել միայն պաշտոնական տեղեկությունների վրա, սակայն նախարարության լրատվականի աշխատակիցները հեռախոսազանգերին չեն պատասխանում:
Չնայած, աշխատանքային ժամն ավարտված է, սակայն հաշվի առնելով հանրապետությունում խոզի գրիպի հետ կապված քաղաքացիների խուճապային տրամադրություններն ու այսօր արդեն գրանցված 3 մահվան դեպքերը, որոնցից մեկը երեկոյան է եղել, նախարարությունը անգամ ուշ ժամերին լավ կլիներ արձագանքեր լրագրողների զանգերին: Փոխարենը նախարարությունը անընդհատ հայտարարում է, որ իրավիճակը կայուն է, եւ պարբերաբար ցուցանիշներ ներկայացնելու փոխարեն, նախարարության գովքն է անում իր հաղորդագրություններում:
Կարդացեք նաև
Նելլի ԲԱԲԱՅԱՆ
