Մայր Աթոռ Սուրբ Էջմիածնին սեփականության իրավունքով անհատույց 0.4 հա հողամաս կհատկացվի: Այս մասին տեղեկանում ենք կառավարության վաղվա նիստի օրակարգից: Ըստ նախագծի՝ Արագածոտնի մարզի Սաղմոսավան համայնքում գտնվող 0.508 հա պետական սեփականության հանդիսացող բնակավայրերի նպատակային նշանակության հողամասից 0.4 հա հողամասը կհատկացվի Հայաստանյաց Առաքելական Սուրբ Եկեղեցուն՝ Մայր Աթոռ Սուրբ Էջմիածնին: Կառավարություն ներկայացրած որոշման համաձայն, հողամասը հատկացվում եկեղեցուն Սաղմոսավան համայնքում մշակույթի կենտրոն կառուցելու նպատակով:
Նախագծի անհրաժեշտությունը, ինչպես նշված է փաստաթղթում, պայմանավորված է այն հանգամանքով, որ նշված տարածքը չի օգտագործվում, դատարկ է, համայնքը մշակույթի կենտրոն չունի եւ Հայաստանյաց Առաքելական Սուրբ Եկեղեցին պատրաստակամություն է հայտնել ՀՀ Արագածոտնի մարզի Սաղմոսավան համայնքի վարչական սահմաններում գտնվող պետական սեփականություն հանդիսացող բնակավայրերի հասարակական կառուցապատման 0.508 հա հողամասից 0.4 հա տարածքը եկեղեցուն հանձնելու դեպքում կառուցել մշակույթի կենտրոն:
Վաղը, կառավարությունն ամենայն հավանականությամբ, հավանություն կտա այս նախագծին:
Նելլի ԲԱԲԱՅԱՆ
