«Այն, որ համայն Ռուսիո պատրիարքը ինչ-որ վրիպում թույլ է տվել կապված Թուրքիայի պատմության հետ, միանշանակ է»,- հունվարի 13-ին «Հայելի» մամուլի ակումբում լրագրողների հետ հանդիպման ընթացքում ասաց կրոնագետ Վարդան Խաչատրյանը:
Հիշեցնենք՝ Մոսկվայի եւ Համայն Ռուսիո պատրիարք Կիրիլը հունվարի 7-ին սուրբծննդյան հարցազրույց է տվել Դմիտրի Կիսիլյովին, որը հեռարձակվել է «Ռոսիա 1» հեռուստաընկերության եթերում: Հարցազրույցի ընթացքում նա, խոսելով Մերձավոր Արեւելքում ստեղծված իրավիճակի մասին, բերել է Օսմանյան կայսրության օրինակը, մասնավորապես՝ ասել է. «Օրինակ՝ վերցնենք թուրքական, Օսմանյան կայսրությունը: Այո՛, եղել են քրիստոնյա փոքրամասնություններ, սակայն նրանց ոչ ոք չի ոչնչացրել»:
Հայտարարությունից հետո պատրիարքի մամուլի խոսնակ Ալեքսանդրա Վոլկովան պարզաբանում էր տարածել, որ Ռուս Ուղղափառ եկեղեցու դիրքորոշումը Հայոց ցեղասպանության վերաբերյալ անփոփոխ է:
Վարդան Խաչատրյանը համարում է, որ պատրիարք Կիրիլը պատմությունը չի իմացել եւ խոսել է Ռուսաստանի ներկայիս քաղաքական հունում, այսինքն՝ որ ներկայիս Թուրքիան դրսեւորվի որպես հնարավոր մեղսավոր կողմ. «Այս տեսանկյունից վրիպումը կապված է նրա հետ, որ Թուրքիայի պատմության մի հատվածը, խոսքը վերաբերվում է Օսմանյան, որը փաստորեն, քարոզում է այսօր Էրդողանը, բայց նա քարոզում է այլ տեսակետից: Այստեղ, փաստորեն, շոշափված է Արեւմուտքի տեսակետը, ինքն այդ տեսակետն է արտահայտում, որ յուրաքանչյուր կայսերապետություն անկախ նրանից, որի մասին ենք խոսում, պետք է իր փոքրամասնությունների հետ լեզու գտնի, որ պահպանվի որպես կայսերապետություն»:
Կարդացեք նաև
Կրոնագետը պատրիարքի հայտարարությունում որեւէ քաղաքական ենթատեքստ չի տեսնում եւ համոզված է, որ չկա. «Որովհետեւ ներկայիս Հայաստանը Ռուսաստանի Դաշնության համար կարեւորագույն դաշնակիցն է: Ռուսաստանում բոլորի համար պարզ է, որ Սիրիայից հետո դիմադրության գոյություն ունեցող հատվածը, Ռուսաստանը պայթեցնելուն խանգարողը եւ դիմադրողը հանդիսանում է Հայաստանը: Այդպիսի քայլ, այդպիսի Հայաստանի դեմ հայտարարություն ուղղակի որեւէ մեկը այսօր, ով ուզում է լինել Ռուսաստանի կողմից, չի կարող անել»:
Ամի ՉԻՉԱԿՅԱՆ
