Aravot.am-ի հետ զրույցում գյումրեցի քաղաքագետ Գագիկ Համբարյանն ասաց, որ եթե Վալերի Պերմյակովի նման ճիվաղն այսօր գտնվում է Գյումրիում, դա ոչ թե Հայաստանի Հանրապետության իշխանությունների շնորհքն է, այլ գյումրեցիների: Ըստ նրա, հանցագործության հաջորդ օրն արդեն ՌԴ նախագահ Վլադիմիր Պուտինը ինքնաթիռ էր ուղարկել Գյումրի իր մարդասպանին տանելու համար, սակայն գյումրեցիների ցասումը, արդար պահանջը հարկադրեց սթափվել Պուտինին ու չգնալ նման ռիսկի:
«Գյումրեցիների հիշողությունից երբեք ու երբեք չի ջնջվի այս սպանդը. ամբողջ տարին գյումրեցին ապրեց այս իրադարձության քողի տակ, երեկ նորից վերապրեցին այդ դաժան օրը, ամեն մի դատավարության ժամանակ այս քաղաքի բնակիչները ծանր սթրես են տանում, բայց պիտի նշել, որ հենց գյումրեցին պարտադրեց Պուտինին, ոչ թե Հայաստանի իշխանությունները, որպեսզի Պերմյակովի նման ճիվաղին դուրս չբերի Հայաստանից: Գյումրեցին դա իր ոգով ու պահանջատիրությամբ արեց, սպանությունից հետո տեղի ունեցած իրադարձությունները պարտադրեցին ՌԴ նախագահ Պուտինին, որն արդեն ուղղաթիռ էր ուղարկել Գյումրի, որ իր հայրենակից մարդասպանին դուրս բերեն Գյումրիից, տանեն Երեւան եւ Երեւանից էլ տեղափոխեն Դոնի Ռոստով, ռուսական ԶԼՄ-ներն այդ մասին գրում էին: Ու գյումրեցին պարտադրեց Պուտինին, որպեսզի հաշվի նստի այն քաղաքի բնակչության հետ, որտեղ գտնվում է 102-րդ ռազմաբազան:
Եվ սա ես համարում եմ շատ մեծ հաղթանակ, ով ինչպես ուզում է թող ներկայացնի, ես կարծում եմ, որ Պուտինը շատ հզոր ղեկավար է, հզոր դիրքեր ունի եւ իր պետության ներսում եւ ամբողջ աշխարհում, իսկ գյումրեցին պարտադրեց հարգել իրեն ու Պերմյակով ճիվաղին թողնել հենց Գյումրիում, ոչ թե Հայաստանի Հանրապետության տարածքում: Գյումրեցին փրկեց ամբողջ Հայաստանի երեսը, գյումրեցին ցույց տվեց, որ ինքը այն աղն է, ինչի մասին գրում էր Շիրազը ժամանակին:
Ու չնայած հիմա Գյումրիի բնակչության թիվը շատ է նվազել, քաղաքը դեռ չի վերականգնել իր դեմքն ամբողջությամբ երկրաշարժից հետո, բայց ինքը մնում է այն աղը, որ համը տալիս է այս ամբողջ երկրին»,- ասաց Գագիկ Համբարյանը:
Կարդացեք նաև
Նունե ԱՐԵՎՇԱՏՅԱՆ
Խորին հարգանքներս ԻՍԿԱԿԱՆ գյումրեցուն:Ես մեծ հարգանք ունեմ նրա հանդեպ ՝առհասարակ: