«ՀՀ-ն կանգնած է լուրջ տնտեսական զարգացումների առջեւ, հատկապես ՌԴ տնտեսության զարգացումների, ռուբլու անկման, նավթի գնի կտրուկ նվազման ֆոնին»,- «Հենարան» մամուլի ակումբում այսօր հայտարարեց ԲՀԿ-ական պատգամավոր Միքայել Մելքումյանը:
«Անցած տարի հինգ հարյուր միլիոն տրանսֆերտ չստացանք: Եթե այսպես շարունակվի, չի բացառվում, որ ՌԴ արտագնա աշխատանքի մեկնող մեր հայրենակիցներից շատերն այս տարի չգնան: Մենք պետք է հասկանանք, որ մեկ միլիարդ դոլարի հասնող տրանսֆերտներ չենք ստանալու»,- կանխատեսեց պատգամավորը` հավելելով, որ կառավարությունը պետք է օպերատիվ կառավարման համակարգի անցնելով լուծումներ գտնի:
Միաժամանակ, Միքայել Մելքումյանը կարծում է, որ մեր կառավարությունից կախված է տեղում հարցերը լուծելու հիսուն տոկոսը. «Ոչ խոսքով, այլ իրականում հակամենաշնորհային եւ մրցակցային հարաբերությունների հստակեցում, հակակոռուպցիոն քաղաքականություն, ներդրումների պաշտպանություն, արտահանման խրախուսման եւ վարկային քաղաքականություն»:
Պատգամավորն առաջարկում է արտադրող-արտահանողներին ռուսական ռուբլով վարկերի տրամադրում, արտահանման ռիսկերի` պետության կողմից իր վրա վերցնում` ռուբլու անկման դեպքում սուբսիդավորում: Նա հույս ունի, որ վաղվա նիստում կառավարությունն այս մասին հայտարարություն կանի:
Կարդացեք նաև
«Անցյալ տարին գյուղատնտեսության ոլորտում աճ եղավ, բայց գյուղացին չի ուրախացել. Սա մեր պետության խնդիրը պետք է լինի»,- ասում է պատգամավորը` առաջարկելով արդյունաբերական եւ սպառողական վարկերի համաներում հայտարարել, բարձրացնել արտադրողի դերը, փայփայել շուկա ունեցող արտադրողներին. «Արտադրողը սահմանին կանգնած զինվորից հետո պետք է մեր երկրորդ հերոսը լինի: Հայ բիզնեսմենի մասին ֆիլմեր չունենք»:
Կառավարության`օպերատիվ կառավարման ձեւաչափում նա նկատի ունի նաեւ, որ առանձին նախարարներ պետք է քաղաքական լուծումներ առաջարկեն իրենց ոլորտներին վերաբերվող. «Մեր քաղաքական համակարգը հիմք չի հանդիսանում, որ քաղաքական պաշտոն զբաղեցնող նախարարը քաղաքական լուծումներ առաջարկի»:
Իր առաջարկների համար գումարներ, Միքայել Մելքումյանը գտնում է, որ կարելի է գտնել կառավարության պահուստային ֆոնդից, արտաբյուջետային գումարներից:
Նա նաեւ հայտարարեց, որ կառավարությունը «գնալու է օպտիմալացման», ինչի մասին հանրությունն ավելի ուշ կտեղեկանա: Օպտիմալացման ֆոնին, նրան քիչ է հետաքրքրում` կրճատումներ կլինեն, թե՞ ոչ, խոսքն, իր կարծիքով, բյուջետային գումարների արդյունավետ կառավարման մասին է:
Նելլի ԳՐԻԳՈՐՅԱՆ
