«Այս տարին տնտեսական իմաստով բարդ է լինելու, բայց մենք պետք է ապագան եւ հեռանկարները տեսնենք: Այս համատեքստում կարծում ենք, որ բավական լավ հնարավորություններ են ստեղծվում Եվրասիական տարածաշրջանի զարգացման առումով եւ այդ հնարավորությունները չպիտի բաց թողնենք»,- այսօր «Sputnik Արմենիա» միջազգային մամուլի կենտրոնում կազմակերպված տեսակամրջի ժամանակ կարծիք հայտնեց ղազախ փորձագետ, «Նուր Օտան» կուսակցության հանրային քաղաքականության ինստիտուտի տնօրենի տեղակալ Վլադիմիր Տելնովը։
Այս տարվա սկզբից ԵԱՏՄ նախագահությունը Ղազախստանին է անցնում: Տեսակամրջի մասնակիցները քննարկում էին ԵԱՏՄ-ի զարգացման հեռանկարները եւ դրան սպառնող խնդիրները: «Ինֆրոստրուկտուրայի եւ կոմունիկացիաների զարգացման մասին պետք է մտածենք: Եթե նախկինում ծովային ճանապարհներն առավելություն էին, ապա այժմ, ժամանակակից տեխնոլոգիաների կիրառմամբ նաեւ ցամաքային ճանապարհներն են բավական մրցունակ դառնում: ԵԱՏՄ-ի շրջանակներում բարդ չի լինի այդ խնդիրների կարգավորումը, մանավանդ, որ չինական Մետաքսի ճանապարհի եւ մեր ծրագրերի մասով բավական արդյունավետ համընկնումներ են լինում»,- ասաց ղազախ փորձագետը:
Նա տեղեկացրեց, որ Ղազախստանն արդեն պայմանագրեր ունի Չինաստանի հետ`չինական մի քանի տասնյակ ձեռնարկություններ կտեղափոխվեն Ղազախստան:
Տնտեսամաթեմատիկական մեթոդների ամբիոնի վարիչ, տնտեսագիտության դոկտոր, պրոֆեսոր Աշոտ Թավադյանը համամիտ է, առանց այդ էլ բարդ տարին մենք չպետք է արհեստականորեն բարդացնենք`հետաձգելով կամ մասամբ կատարելով ԵԱՏՄ-ի փաստաթղթում ամրագրված կետերի կիրառումը: «Ի վերջո, ԵԱՏՄ-ն ստեղծվել է տնտեսական խնդիրները լուծելու համար»,- ասաց փորձագետը` հավելելով, որ արագ լուծումներ պետք է տրվեն դրամավարկային քաղաքականությանը, ինֆլյացիայի հարցերին, կոռուպցիոն խնդիրներին: Նա առաջարկում է ԵԱՏՄ հակաճգնաժամային կոմիտե ստեղծել, որը կզբաղվի առկա խնդիրները կարգավորելով ԵԱՏՄ համաձայնագրի կետերի կիրառմամբ:
Կարդացեք նաև
ՌԳԱ Եվրոպայի ինստիտուտի ԱՊՀ երկրների ռազմավարական զարգացման կենտրոնի ղեկավար, ռազմավարական պլանավորման ու կանխատեսման ինստիտուտի տնօրեն Ալեքսանդր Գուսևը լավատեսորեն է վերաբերվում ապագային`չնայած, աշխարհաքաղաքական, տնտեսական, սոցիալական խնդիրներին, ՌԴ-ի նկատմամբ Արեւմտյան պատժամիջոցների շարունակմանը: Համաձայն է, որ պետք է արագացնել միասնական արժույթի անցումը`նվազագույնի հասցնելու համար ռիսկերը: Նա կարեւորում է ԵԱՏՄ-ի վերազգային կառույցների ձեւավորումը`Եվրոպական կոմիտեն` Մոսկվայում, ֆինանսական կենտրոնն՝ Աստանայում, դատարանը`Մինսկում: Սա, ռուս փորձագետի գնահատմամբ, փաստում է ԵԱՏՄ-ի վերազգային կառույց լինելը:
Նա տեղեկացրեց նաեւ, որ ԵԱՏՄ-ի շրջանակներում այժմ աշխատանքներ են տարվում Հայաստանի եւ Ղազախստանի միջեւ մաքսային կարգավորումների ուղղությամբ, դեղերի, մեքենաների, էներգակիրների շուկաների կարգավորումներն են արվում:
Նելլի ԳՐԻԳՈՐՅԱՆ
