«Մարդու իրավունքների պաշտպանի`հրաժարականի երեկվա դիմումը ոտնձգություն է անձեռնմխելի համարվող սահմանադրական մարմնի նկատմամբ»,-այսօր «Մեդիա կենտրոնում» հրավիրված քննարկմանը հայտարարեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Ըստ նրա` իշխանությունները փոխել են իրենց քաղաքականությունը և ինքնապաշտպանության համար օգտագործում են հարձակվողական մեխանիզմներ:
Կարեն Անդրեասյանի հետ կատարվածը պարոն Սաքունցը համարում է սպառնալիք յուրաքանչյուր ՀՀ քաղաքացու նկատմամբ. «Սա մեկ այլ որակի մտածողության արտահայտություն է`ոչ միայն անպատժելիության, այլև նախահարձակ լինելու մտածողության արդյունք»:
Պարոն Սաքունցը համեմատության համար նշեց ՀՀ երկրորդ նախագահ Ռոբերտ Քոչարյանի պաշտոնավարման երկրորդ փուլը, երբ ՀԿ-ները 2004-ի ապրիլյան ջարդից հետո ցույց կազմակերպեցին Ազատության հրապարակում, բայց նրանց նկատմամբ չկիրառվեց այն, ինչ քաղաքական ուժերի նկատմամբ:
Կարդացեք նաև
Հիմա Արթուր Սաքունցը այլ իրավիճակ է տեսնում և դա պատճառաբանում զսպող գործոնների նվազմամբ. «Զսպող գործոնների դերը, որը կար մինչև 2013-ի սեպտեմբերի 3-ը, հիմա նվազել է: Նկատի ունեմ այն գործոնները, որոնք կային ՀՀ-ի` որպես ԵԽ անդամ պարտավորությունների կատարման առումով: Հիմա հարձակողական ոճի վարքագիծ եմ արձանագրում՝ ուղղված ազատ մտքի, գործողության, բողոքի ցույցերի նկատմամբ, ինչը բացահայտում է վարչակազմի ողջ ապօրինությունն ու բովանդակությունը»:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
