Ներքաղաքական կյանքում, մեր կանխատեսմամբ, այս տարի տեղի է ունենալու եւս մի գործընթաց, որը միգուցե առերեւույթ այնքան էլ տեսանելի չլինի, սակայն իր կարեւորությամբ չի զիջում հնարավորինս փոխընդունելի Ընտրական օրենսգիրք մշակելու անհրաժեշտությանը: Ո՞րն է այդ գործընթացը, կամ՝ ի՞նչ նկատի ունենք:
Խոսքը համախոհների, համակիրների լուրջ թիմեր ձեւավորելու մասին է: Արդեն առիթ ունեցել ենք նկատելու, որ ընդդիմադիր ուժերի միջեւ կանխատեսելի է լուրջ պայքար եւ սուր մրցակցություն՝ բողոքական ընտրազանգվածի համար, որը, դատելով թեկուզ հենց հանրաքվեի արդյունքներից, պատկառելի է եւ վճռորոշ նշանակություն կարող է ունենալ իշխանության համար պայքարում:
Կյանքը ցույց տվեց նաեւ, որ առանձին ընդդիմադիր ուժեր կարող էին եւ իրենց համար ավելի ձեռնտու ընտրական պատկեր արձանագրել, եթե կարողանային համախմբել որոշակի թվով կողմնակիցների եւ, նրանց հետ որոշակի աշխատանք տանելուց հետո, ներգրավելով ընտրական գործընթացում, այդպիսով ավելի արդյունավետ վերահսկողություն ապահովելու հնարավորություն ստանալով:
Թե այդ ուղղությամբ ինչ քայլեր կարող են կամ կձեռնարկեն, ասենք, ՀՅԴ-ն, ԲՀԿ-ն կամ, օրինակ, ՀԱԿ-ն ու ՕԵԿ-ը, դեռ կտեսնենք: Ինչ վերաբերում է նորակազմ քաղաքական ուժերին, ապա Ն.Փաշինյանի «Քաղպայմանագիրը» բացեիբաց նշել է իր այդ առաջնահերթությունը: Խոսքը առնվազն 6000 վստահված անձանց «բանակ» ձեւավորելու եւ այդպիսով երկրի բոլոր ընտրատեղամասերում իրենց վերահսկողությունն ապահովելու մոտեցման մասին է:
Կարդացեք նաև
Հասկանալի է, որ միայն նրա մտքով չէ, որ նման բան է անցել: Բայց հարցն այն է, թե ընդդիմադիր որ ուժերին կհաջողվի նման լուրջ թիմ համախմբել: Մեկ այլ հարց է եւ այն, թե նրանք որքանով կկարողանան միմյանց հետ համագործակցել՝ նույն այդ նպատակով:
Պարզ է նաեւ, որ Է.Մարուքյանի «Լուսավոր Հայաստանն» ու Տ.Ուրիխանյանի «Ալյանսը» եւս կենտրոնանալու են հնարավորինս շատ համակիրներ ներգրավելու վրա: Այդ անհրաժեշտությունը հուշում է, որ ներքին ու արտաքին իրադարձությունների հետ կապված հրապարակային արձագանքներում նորակազմ ուժերը ձգտելու են շատ ավելի ակտիվ լինել:
Ա. ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
