«2015 թվականի սեպտեմբերի 11-ին եղավ նախագահի հանձնարականը, որպեսզի որոշակի մեղմացուցիչ փոփոխություններ լինեն վարչական իրավախախտումների համակարգում: Անցավ 5 ամիս եւ մենք ականատես ենք լինում այդ ամբողջ հանձնարարականի ընդամենը մեկ բաղադրիչի մասնակի բավարարմանը»,- այս մասին այսօր «Հենարան» ակումբում հայտարարեց «Դուրս մեր գրպանից» նախաձեռնության անդամ Արմեն Եփրեմյանը:
Խոսելով «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ եւ լրացումներ կատարելու մասին» ՀՀ օրենքին եւ օրենքին կից ներկայացված օրենքների փաթեթի մասին՝ Արմեն Եփրեմյանն ասաց, որ իրենց նախաձեռնությունը բավարարված չէ. «Առարկություններ չունենք, բայց լրացումներ ունենք եւ պահանջում ենք, որպեսզի կազմի նոր օրենսգիրք եւ ներառվեն բոլոր բացթողումները»:
Որոշակի խախտումների համար տուգանվելու փոխարեն նախազգուշացվելու համակարգի ստեղծումը «Դուրս մեր գրպանից»-ի անդամների մոտ տպավորություն է ստեղծել, որ մարդիկ կարող են վճարել եւ անվերջ խախտումներ կատարել: «Մենք ունենք անսահման, անբարեխիղճ վարորդներ: Նրանց կարելի է 6 ամսով կամ 1 տարով զրկել վարորդական իրավունքից: Այսպես` նրանք կարող են վճարել եւ խախտումներ իրականացնել: Չափորոշիչները ձեւակերպված չեն»:
Կարդացեք նաև
Նախաձեռնության մյուս անդամը՝ Արսեն Պետրոսյանը նշեց, որ մինչեւ համակարգային փոփոխություններ չլինեն, այսպիսի փոփոխությունները լինելու են գործընթացի շարունակություն: «Այսինքն, եթե նախկինում գծերը տրորելու համար տուգանում էին, հիմա զգուշացնելու են: Այսինքն` նույն բանը շարունակվելու է հիմա: Եթե մի գործունեության մեջ կա ձեռնարկատիրական մոտեցում, մենք դա համարում ենք, որ օբյեկտիվ գործընթաց չէ: Այս համակարգում համակարգային փոփոխություններ էին պետք: Արդարադատության նախարարությունը ոչ մի շահագրգիռ կողմի չի հրավիրել քննարկման: Դրա համար մենք գտնում ենք, որ օրենքում բազում բացեր կան: Մենք դրանում հետագայում կհամոզվենք»:
Ըստ Արսեն Պետրոսյանի՝ այս օրենքում նաեւ դրական կետեր կան: Մասնավորապես՝ ոգելից խմիչք օգտագործած վարորդների նկատմամբ կիրառվող պատժի խստացումը: «Դա նորմալ է, տենց էլ պետք է լիներ: Դրական բաներ կան այս ամեն ինչի մեջ: Ի՞նչ տեղի ունեցավ համաներումից հետո: Մի՞թե փողոցները լայնացան, գծերը կարճացան: Թող այն մարդկանց, որոնք միլիոններ տուգանքներ ունեն, առաջարկեին ոչ թե մայր գումարը միայն վճարեին, այլ բողոքարկման մեխանիզմներ էլ ներդնեին»:
Աշոտ ԻՍՐԱԵԼՅԱՆ
