«Ազատամարտիկների Դաշինքի» համակարգող խորհրդի անդամ Սմբատ Հակոբյանը զարմացած է դաշինքի անդամ, կալանավորված ազատամարտիկ Հարություն Սարիբեկյանին առաջադրված մեղադրանքից: «Զիմ» մականունով հայտնի ազատամարտիկը, Սմբատ Հակոբյանի բնորոշմամբ, ակտիվ ազատամարտիկներից էր. «Մեր ոչ մի ակցիաներից չի հրաժարվել, մեզնից շատ, գիշեր-ցերեկ կանգնած է եղել ու արժանիքներով անձնավորություն է, լավ հայ»:
Հիշեցնենք, որ «Զիմին» մեղադրում են Արթուր Վարդանյանի խմբին զենք վաճառելու մեջ: Ըստ մեղադրանքի, «Զիմը» «մուխա» տեսակի զենք է տվել: «Զիմը» չի ընդունում մեղադրանքը և ի նշան բողոքի՝ արդեն 28 օր է, հացադուլի մեջ է:
«Նման դեպքերում պատկան մարմինները համապատասխան կարգով հանրությանը տեղեկացնում են կալանավորելու հիմնավոր պատճառները: Թե չէ, «Զիմիկը» մեկին մուխա է տվել կամ մյուսին ավտոմատ է տվել, ինչի համար է տվել, ինչի համար է հավաքվել այդ ամբողջը, պետք է պարզաբանեն: Բոլոր կալանավորված ազատամարտիկներին՝ Ապարին, մյուսներին, բոլորին անձամբ ճանաչում եմ եւ որեւէ անգամ մեր ժողովրդի, մեր պետության դեմ որեւէ քայլ չեմ նկատել նրանց կողմից : Զիմի հետ մենք տարբեր գծերում ենք կռվել, մարտի դաշտում ընդհանուր խաչմերուկներում հանդիպել ենք, բայց ես առանձին ջոկատի հրամանատար եմ եղել, ինքը՝ «Տիգրան Մեծ» ջոկատում է եղել»,- ասաց Սմբատ Հակոբյանը:
Կարդացեք նաև
Ազատամարտիկը նկատեց, որ մինչեւ կալանավորվելն էլ «Զիմը» առողջական խնդիրներ ուներ. «Կաշին ու ոսկորն էր մնացել: Կենսական պայմաններն էլ շատ վատն էին, հազիվ ծայրը ծայրին հասցնում էր»:
Ազատամարտիկների Դաշինքը առաջիկա չորեքշաբթի օրվա վարչության նիստում այլ հարցերի շարքում քննարկելու է նաեւ կալանավորված ազատամարտիկների հարցը: Պարոն Հակոբյանն ասաց, եթե մինչեւ այդ Հարություն Սարիբեկյանը դադարեցրած չլինի հացադուլը, իրենք հայտարարությամբ հանդես կգան:
Ի դեպ, Հարություն Սարիբեկյանը հրաժարվել է հանրային պաշտպանի ծառայություններից, նրա պաշտպանությունը ստանձնելու է փաստաբան Արա Զաքարյանը:
Արփինե ՍԻՄՈՆՅԱՆ
