Կրթության փորձագետ Անահիտ Բախշյանը ծիծաղելի է որակում պաշտոնի բերումով ստացած թանկարժեք նվերները հանձնելու մասին այն գրությունը, որը ԿԳ նախարարությունից ուղարկվել է ենթակա հաստատություններին:
«Ես գիտեմ, որ բարձրաստիճան պաշտոնյաների հետ կապված ինչ-որ արգելք կա, որ չի կարելի որոշակի չափից այն կողմ նվերներ ստանալ, բայց մեր երկրում ո՞վ է դրան ենթարկվում, ո՞վ է հաշվի առնում այդ օրենքը: Ես չեմ բացառում, որ դպրոցի տնօրենն էլ, բուհի ռեկտորն էլ, ԿԳ նախարարության ենթակայությամբ գործող որեւէ հաստատության ղեկավար էլ նվազագույն աշխատավարձի քառապատկից ավելի նվեր չի ստանում: Եվ եթե այդ գրությունը նրա համար է, որ կանխեն, դա ընդամենը ծիծաղելի վիճակի մեջ կդնի նախարարությանը: Նվերներ ստանալու դեմ պայքարը բոլորովին ուրիշ տեղ է, ուրիշ ճանապարհ, ուրիշ մոտիվացիա, ուրիշ հիմնավորում: Այնպիսի պահանջներ եւ չափորոշիչներ պետք է դրվեն պաշտոնյաների առաջ, որ իրենք զերծ մնան այդ նվերները ստանալուց, թե այդ գրությունը շատ ծիծաղելի է»,-համոզված է տիկին Բախշյանը:
Գոհար ՀԱԿՈԲՅԱՆ
Լուսանկարը` PHOTOLUR-ի
