«Սաուդյան Արաբիա-Իրան հարաբերությունների սրման պատճառները մի քանիսն են: Առաջինն իշխանության եկած նոր թագավորական ընտանիքին ճյուղի հավակնություններն են տրանզիցիան թագավոր Սալմանից իր որդուն անցկացնել որքան հնարավոր է հարթ եւ վստահ»,- այս մասին այսօր «Հայելի» ակումբում լրագրողների հետ հանդիպմանն ասաց քաղաքագիտության դոկտոր Հայկ Մարտիրոսյանը:
Ըստ պարոն Մարտիրոսյանի՝ երկրորդ պատճառը միտումն ու մղումն է ԱՄՆ-ին թույլ չտալ առավել մերձենալ Իրանի հետ: «Առաջին մասով խնդիրը կայանում է նրանում, որ Մուհամմադ Սալմանը, որը Սալման թագավորի որդին է, պաշտպանության նախարարն է եւ երկրորդ թագաժառանգը: Եվ խնդիր կա Մուհամմադ Բին Նայեֆի հետ կապված, թե ով պետք է ժառանգի, որովհետեւ առաջին անգամ պետության հիմնադրի որդիների մեջ չի լինելու ժառանգությունն, այլ՝ երրորդ սերնդի միջեւ: Սա այն արկածախնդրական մոտեցումներից մեկն է, որն ըստ արքայազն Մուհամմադի՝ պետք է իրեն լեգիտիմություն տա ներքին դաշտում եւ հնարավորություն՝ ստեղծելու հանդես գալ որպես ուժեղ ռազմական ղեկավար»:
Հայկ Մարտիրոսյանն ասաց, որ այս առճակատման հետեւանքները դժվար է կանխորոշել, որովհետեւ այդ տարածաշրջանում իրավիճակը հետագայում ավելի կսրվի: «Այս քաղաքականությունը վնասում է հենց իր՝ Սաուդյան Արաբիայի շահերին, բայց, այնուամենայնիվ, որեւէ նշան, որ նպատակ կա դասեր քաղելու եւ քաղաքականությունը փոխելու, ես չեմ տեսնում»:
Հունվարի 2-ին ՀՀ ոստիկանությունը հաղորդագրություն էր տարածել, որ «Զվարթնոց» օդանավակայնում ձերբակալվել է ահաբեկչության մեջ մեղադրվող, հետախուզման մեջ գտնվող Բահրեյնի քաղաքացի Ֆադհել Ռ.-ին: Այնուհետեւ պարզ է դարձել, որ Ֆադհել Ռ.-ին ընդդիմադիր ակտիվիստ է, իսկ Բահրեյնում գործող Դրակոնյան օրենքներով՝ նա կարող է համարվել ահաբեկիչ: Քաղաքագետի կարծիքով՝ Հայաստանն այդ անձին արտահանձնելու հարցով խնդիր ունի, քանի որ պետք է հասկանա՝ ինչպես պահի իրեն, որպեսզի չդառնա հանցակից. «Որովհետեւ եթե դու վերադարձնում ես մարդու, որին սպասում են կտտանքներ կեղծ մեղադրանքների հիման վրա, եթե դրանք կեղծ են, ապա դու դառնում ես հանցակից: Սա այն խնդիրն է, որ մեր իշխանությունները եւ հասարակությունը պետք է լուրջ վերաբերվեն»:
Կարդացեք նաև
Աշոտ ԻՍՐԱԵԼՅԱՆ
