Coca-Cola ընկերությունը պաշտոնապես ներողություն է խնդրել սոցիալական ցանցերում հրապարակած քարտեզի համար, որտեղ Ղրիմն ընդգրկված է Ռուսաստանի կազմում: Coca-Cola-ի ավագ փոխնախագահ Քլայդ Թագլի անունից ներողության խնդրանքով նամակը հրապարակվել է այսօր հունվարի 7-ին ԱՄՆ-ում Ուկրաինայի դեսպանատան կայքում: Փաստաթուղթը հասցեագրված է ԱՄՆ-ում Ուկրաինայի դեսպան Վալերի Չալիին, հաղորդում է Deutsche Welle–ն:
Նամակում ասվում է, որ քարտեզը պատրաստված է կողմնակի գործակալության կողմից առանց Coca-Cola ընկերության հետ համաձայնեցնելու եւ իմացության: Ուկրաինական շուկան կարեւոր է ընկերության համար ու նա կշարունակի այնտեղ ակտիվ աշխատել, ընդգծված է փաստաթղթում: Այնտեղ նշված է նաեւ, որ Coca-Cola-ն զբաղվում է երկրում բազմաթիվ սոցիալական նախագծերով:
Ավելի վաղ, «ВКонтакте» սոցցանցում սուրբծննդյան գովազդային ակցիայի ժամանակ, Coca-Cola-ի ռուսական ներկայացուցչությունը տեղադրել էր ոճականացված քարտեզ, որտեղ Ռուսաստանը պատկերված է առանց Ղրիմի: Բազմաթիվ բողոքներից հետո Ղրիմն ընդգրկվեց քարտեզում, իսկ ընկերությունը ներողություն հայցեց: Ուկրաինայի դեսպանությունը նշեց, որ Coca-Cola-ի գործողությունները հակասում են ԱՄՆ պաշտոնական դիրքորոշմանն, ըստ որի՝ Ղրիմը համարվում է Ուկրաինայի օկուպացված տարածք: Նաեւ քարտեզի հետ կապված միջադեպի պատճառով Գերագույն Ռադայի մի շարք պատգամավորներ կոչ արեցին բոյկոտել ընկերության արտադրանքը:
Ավելի ուշ Coca-Cola-ն ներողություն խնդրեց միջադեպի համար, իսկ գրառումը քարտեզի հետ միասին հանվեց: «Մենք ոչ մի քաղաքական շարժումների եւ կուսակցությունների չենք սատարում: Մեր խնդիրը՝բարձրորակ ըմպելիքների արտադրությունն է», – ասված էր ընկերության հայտարարության մեջ: Coca-Cola-ում նաեւ հավելեցին, որ կորպորացիան աշխատում է «հանուն խաղաղության» եւ պահպանում իրավունքի նորմերը:
Կարդացեք նաև
Ֆոտո՝ Deutsche Welle
