Ինչպես հայտնի է, Հիմնադիր խորհրդարանի եւ «Նոր Հայաստան» հանրային փրկության ճակատի անդամ Գեւորգ Սաֆարյանի նկատմամբ դատարանը որպես խափանման միջոց կիրառել է կալանքը: Նրան ձերբակալել էին Ամանորի գիշերը՝ ոստիկանի նկատմամբ բռնություն կիրառելու մեղադրանքով:
Այս մասին Aravot.am-ը զրուցեց Հիմնադիր խորհրդարանի փոխնախագահ, «Նոր Հայաստան» հանրային փրկության ճակատի անդամ Վարուժան Ավետիսյանի հետ:
«Մենք պետք է նկատի ունենանք, որ մեր երկիրը զավթել են, օկուպացրել են մեր երկիրը, մենք գործ ունենք հանցավոր համագործակցության վերածված վարչախմբի հետ իր ՀՀԿ-ով, կուսակցություններով, կազմակերպություններով, անհատներով, օլիգարխներով: Դա մեկ հանցավոր համագործակցություն է, որը վերցրել է ժողովրդի իշխանությունը, մեզ պատերազմ է հայտարարել, եւ պատերազմում է մեր դեմ, բոլոր իրավական ինստիտուտների անվան տակ հանդես գալու դեպքերը իմիտացիոն ձեռնարկումներ են՝ օկուպացիան շարունակելու համար»,- ասաց նա:
Վարուժան Ավետիսյանը նշեց, որ նույնը կատարվում է նաեւ Գեւորգ Սաֆարյանի պարագայում, քանի որ Գեւորգ Սաֆարյանը պայքարող երիտասարդության ներկայացուցիչ է եւ հեղինակություն է վայելում երիտասարդության շրջանակում:
Կարդացեք նաև
Հետաքրքրվեցինք՝ թե արդյոք տեղեկություններ ունեն Գեւորգ Սաֆարյանից, նա պատասխանեց, որ դեռ ոչ:
Հարցին, թե իրականությանը համապատասխանո՞ւմ են այն տեղեկությունները, որ Գեւորգ Սաֆարյանը հացադուլ է հայտարարել, Վարուժան Ավետիսյանը պատասխանեց, որ այժմ ճշտում են այդ տեղեկատվությունը, իսկ մտավախությունները, որ նրան կարող են տեղավորել քրեական հանցագործների հետ, դեռ առկա են:
Ամի ՉԻՉԱԿՅԱՆ
