«Հայ առաքելական եկեղեցին տարին սկսում է Սուրբ Ծնունդով: Եկեղեցական տարվա առաջին օրը Սուրբ Ծնունդն է, այսինքն՝ ոչ թե դեկտեմբերի 31-ը, այլ հունվարի 5-ը»,-Aravot.am-ի հետ զրույցում, խոսելով Սուրբ Ծննդի կարեւորության մասին, ասաց Մայր Աթոռ Սուրբ Էջմիածնի սոցիալական ծառայության տնօրեն Տեր Մարկոս քահանա Մանգասարյանը:
Նրա խոսքով՝ Ամանորն, ըստ էության, խրախճանքի, քեֆ անելու, զվարճանալու օր է, իսկ Սուրբ ծնունդը՝ հոգեւոր ուրախության օր, «Խոսքն այն ուրախության մասին է, որը կապված է ոչ թե նյութի եւ աշխարհիկի, այլ հոգու հետ: Երբ քրիստոնյա-մարդու մասին ենք խոսում, բնականաբար, Սուրբ ծնունդը նրա համար առավել հաճելի եւ ցանկալի տոն պետք է լինի: Ոչ մեկ չի ասում՝ Ամանոր մի նշեք, բայց երբ Ամանորի վրա այնքան են սեւեռվում, որ մոռանում են Սուրբ ծնունդը, ուրեմն քրիստոնյայի մասին չէ խոսքը»:
Տեր Մարկոսը սեփական ընտանիքի օրինակը վկայակոչեց՝ ասելով, որ դեկտեմբերի 30-ից պահք են պահում. «Մեր տանը կգտնեք պահոց ուտելիքներ, իսկ սեղանը զարդարված չի լինելու ճոխ, տարատեսակ ուտելիքներով, որոնց մեծ մասը հետո նաեւ թափվելու է: Այսինքն, քրիստոնյան Սուրբ ծննդին պետք է պատրաստվի պահեցողությամբ»:
Կարդացեք նաև
Տեր Մարկոսից հետաքրքրվեցինք, թե մեր հասարակությունը որքանով է պատրաստ նշյալ կերպ սկսելու տարին: «Մեծամասամբ պատրաստ չէ: Միաժամանակ, ավելանում է գիտակից քրիստոնյաների թիվը, որոնք ավելի են կարեւորում Սուրբ ծննդի խորհուրդը: Իսկ ընդհանուր առմամբ, մարդիկ մեծամասամբ պատրաստ չեն դրան, ուտել-խմելով են տարված լինելու Սուրբ ծննդից առաջ»,-ասաց մեր զրուցակիցը:
Լուիզա ՍՈՒՔԻԱՍՅԱՆ
Լուսանկարը՝ տեր Մարկոսի «ֆեյսբուքյան» էջից
