Aravot.am-ը Շիրակի թեմի առաջնորդ Միքայել եպիսկոպոս Աջապահյանից հետաքրքրվեց, թե նախագահի ու կառավարության ղեկավարի՝ վերջին շրջանում Գյումրին աշխուժացնելու փորձերը, օրինակ՝ ասենք 23 միլիոն եվրոյի վարկ տրամադրելը կամ աշխատատեղեր ստեղծելու մտահոգությունը արդյո՞ք ուշացած չեն: «Ուշ լինի, նուշ լինի, լավ է ուշ, քան երբեք, այդպես չէ՞, ուշացվածությունը կա, անշուշտ կա, բայց լավ է ուշ, քան երբեք, լավ չէ՞, համաձայն չե՞ս», -հարցրեց Սրբազանը: Մեր դիտարկմանը, թե մարդիկ արտագաղթում են, քաղաքը դատարկվում է աշխատատեղեր չլինելու պատճառով, Միքայել եպիսկոպոս Աջապահյանն ասաց.
«Դե հիմա արտագաղթեցին, բայց արտագաղթողները միշտ չէ, որ արտագաղթում են արտասահման, զգալի հոսք կա նաեւ Գյումրիից Երեւան, այնպես որ արտագաղթի 100 տոկոսն էլ արտասահման են գնում, զգալի տոկոս կազմում են Երեւան տեղափոխվողները: Հիմա, եթե ինֆրաստրուկտուրան, ենթակառույցները Գյումրիում վերագործարկվեն, հնարավոր է որոշակի նաեւ ներգաղթ լինի: Եթե նույնիսկ ներգաղթ էլ չլինի, ապա գոնե կլինի բնական աճ. մարդիկ մի զավակ ունենալու փոխարեն 3-4 զավակ կունենան, չէ՞, արտագաղթը կդադարի, եթե արտագաղթը դադարի, արդեն բնական աճ տեղի կունենա, եւ քաղաքը իրեն կվերագտնի, երբեք ուշ չէ այդ իմաստով փորձել քաղաքը վերաշինել, երբեք ուշ չէ: Վերջիվերջո այս քաղաքը 150-200 տարի առաջ գյուղ էր, մեծացավ , մեծացավ, մեծացավ, հասավ իր ծաղկման գագաթնակետին եւ երկրաշարժից հետո անկում ապրեց: Բոլոր քաղաքներն էլ էսպես կենսագրություն ունենում են, մեծանում են, փոքրանում են: Հիմա մեր դժբախտությունը նրա մեջ է, որ մեր կյանքը համընկավ այս անկման շրջանի հետ, բայց եթե անկման շրջանի հետ համընկավ, մենք այդ անկումը եկեք վերելքի վերածենք, երբեք էլ ուշ չէ»:
Հարցին՝ համամի՞տ եք այն գնահատականի հետ, թե Գյումրին ընդդիմադիր քաղաք է, Սրբազանն ասաց. «Գյումրին միշտ է եղել ընդդիմադիր քաղաք. Գյումրին ընդդիմադիր է եղել ռուսական կայսրության օրոք, առաջին հանրապետության օրոք, խորհրդային կայսրության օրոք, ընդդիմադիր էլ է հիմա եւ դա լավ է, դա Գյումրիի բնորոշ հատկանիշն է, բնավորությունն է, ի՞նչ կա դրա մեջ, ընդդիմադիր լինելը հանցագործությո՞ւն է, հա՞: Հանցագործություն չէ, թող մի քաղաք էլ լինի ընդդիմադիր միշտ օրվա իշխանությանը, ի՞նչ վատ է դա. իշխանությունները ավելի սթափ կլինեն»:
Նունե ԱՐԵՎՇԱՏՅԱՆ
