«2015 թվականին մեր արտաքին քաղաքականության օրակարգի գլխավոր հարցերից մեկն, իհարկե, Լեռնային Ղարաբաղի հակամարտությունն է: Այս տարվա կարեւոր իրադարձություններից էր Բեռնում դեկտեմբերի 19-ին Ադրբեջանի եւ Հայաստանի նախագահների հանդիպումը, որին մասնակցում էին նաեւ ԵԱՀԿ Մինսկի խմբի համանախագահները»,- այս մասին, ըստ «Apa»-ի, լրագրողների հետ հանդիպմանը հայտարարել է Ադրբեջանի ԱԳ նախարար Էլմար Մամեդյարովը:
Խոսելով շփման գծում հրադադարի ռեժիմի խախտումների մասին՝ Մամեդյարովը նշել է, որ 1994 թվականին ուժի մեջ մտած հրադադարից հետո կրակոցները եւ զոհերն ավարտ չեն ունեցել. «Պատերազմն արդեն 20 տարի է՝ շարունակվում է: Շփման գծում եւ հայ-ադրբեջանական սահմանին իրավիճակը նման է Առաջին եւ Երկրորդ համաշխարհային պատերազմներին: Զինվորները շարունակում են կանգնած մնալ, խրամատ փորել, զենք ուղղել իրար դեմ»:
Ադրբեջանի արտաքին քաղաքական գերատեսչության ղեկավարը բռնությունները եւ զոհերը վերացնելու միակ ճանապարհ է տեսնում «հայկական զորքերի դուրսբերումը»: Ըստ նրա՝ կարեւոր նշանակություն ունի նաեւ հայերի եւ ադրբեջանցիների շփումները:
Պատրաստեց Աշոտ ԻՍՐԱԵԼՅԱՆԸ
