Aravot.am-ի հարցին, թե ի թիվս այլ ոլորտների, շինարարությունը եւս անկում է ապրել, ի՞նչ քաղաքաշինական ծրագրեր այդ պատճառով եկող տարի չեն իրագործվի, քաղաքաշինության նախարար Նարեկ Սարգսյանը, որն այսօր, քաղաքաշինության նախարարությունում ամփոփեց տարին, ասաց, որ շինարարության ոլորտում անկում չի արձանագրվել: Մեր այն դիտարկմանը, թե տնտեսագետներն են այդպես պնդում, պարոն Սարգսյանն ասաց, որ «2014-2015 թթ. շինարարությունը, բարեբախտաբար, կայուն կանգնած է 10 տոկոս ՀՆԱ-ի մեջ: Բոլոր ծրագրերը, որ մենք ծրագրել ենք եւ վստահություն ունենք, որ հաջորդ տարվանից կսկսվի, մենք նույնիսկ կանխատեսում ենք 2016 թվականի վերջին մինչեւ 2 տոկոս աճ»:
Նարեկ Սարգսյանի մեկնաբանությունները` տեսանյութում
Նախարարը պատասխանելով այն հարցին, թե Բուզանդ-Տերյան խաչմերուկում կառուցվող նորակառույցը արդյոք վարչապետ Հովիկ Աբրահամյանի ընտանիքին է պատկանում, ասաց, որ այդտեղ կառուցվող բիզնես կենտրոնը վարչապետի հետ կապ չունի:
Մանրամասները` տեսանյութում
Կարդացեք նաև
Նարեկ Սարգսյանի խոսքերով, փոքր օբյեկտների կառուցումը հաջորդ տարվանից պարտադիր լիցենզավորման պահանջներից կազատվի, ինչն, ըստ նախարարի, 40 տոկոսով կէժանացնի շինարարության ծախսերը: Նարեկ Սարգսյանի խոսքերով.
«Մինչ հիմա օրենքը պարտադրում էր, որ այս մարդիկ ունենան լիցենզավորված շինարարություն, եւ մինչ այս այդ հարցը մոտ 40 տոկոսով թանկացնում էր շինարարությունը: Հիմա արդեն այդ օրենսդրական փոփոխության միջոցով այդ խնդիրը լուծված է»: Ըստ նրա, քաղաքացին պետք է դիմի համայնքի ղեկավարին, գլխավոր հատակագծի վրա ներկայացնի տեղադրման սխեման եւ շինարարության իրավունք ստանա:
Խոսելով կիսակառույցներից, որոնք տարիներ ի վեր այդպես էլ անավարտ մնացել են մայրաքաղաքում, պարոն Սարգսյանն ասաց, որ Երիտասարդական պալատի տեղում կառուցվելիք օբյեկտը ճապոնացիների նախագծով պետք է լիներ, քանի որ մրցույթը նրանք էին շահել, բայց այն չի կառուցվի, ինչի համար նախարարը ուրախ է:
Ըստ նրա, այդ կառույցն ընդհանրապես հարիր չէր Երեւանի ճարտարապետական տեսքին:
Նարեկ Սարգսյանն ասաց, որ Հայաստանում 226 կիսավարտ շինություն կա, որոնց 5-10 տոկոսը հնարավոր է, որ պիտանի չլինեն:
Անդրադառնալով աղետի գոտուն, նախարարն ասաց, որ աղետի գոտում ինչքան որ շենքեր են փլուզվել, նույն մակերեսով այս տարիների ընթացքում շենքեր են կառուցվել:
Ֆիրդուսիի շինարարությունը եկող տարի կսկսվի: Պարոն Սարգսյանը վստահեցրեց, որ «Հին Երեւանի» նախագիծը եւս պատրաստ է. կառավարությունը պայմանագիր է ստորագրել շվեյցարահայ գործարարի հետ եւ ծրագրի ընդհանուր ներդրումային արժեքը կկազմի մոտ 150 միլիոն դոլար. «Նախապատրաստական աշխատանքները կազմակերպված են, ոչ հուշարձան շենքերը կքանդվեն, մոտ 3 հեկտար տարածք է, իրացման գործընթացն այդտեղ շարունակվում է, արդեն 10 ընտանիք իրացման պայմանագրերը ստորագրեցին»:
Նարեկ Սարգսյանը նաեւ ներկայացրեց Գորիսում իրականացվելիք «Խելացի քաղաք» ծրագրից, համաձայն որի, նոր տեխնոլոգիաներով Գորիսի պահպանված ազգային նկարագրով թաղամասում, որտեղ 20 տարուց ավելի ապրում են Բաքվից փախստականներ, կլուծվեն նրանց բնակարանի խնդիրները: Ներկայումս այդ ընտանիքները, որոնց թիվը, Նարեկ Սարգսյանի տվյալներով, 70 է, սոցիալական վատ վիճակում են եւ ապրում են վագոն տնակներում:
Ծրագրով նախատեսվում է կառուցված շենքերի վրա մանսարդային հարկեր ավելացնել եւ այդ միջոցով լուծել նրանց խնդիրը:
Լուսինե ԲՈՒԴԱՂՅԱՆ
