Էկոնոմիկայի նախարարության փոքր և միջին ձեռնարկատիրության զարգացման վարչության պետ Արամ Օհանյանն այսօր «Արմենպրես» լրատվական գործակալությունում լրագրողների հետ հանդիպման ընթացքում ներկայացրեց պետության կողմից ՓՄՁ-ների աջակցության ուղղությամբ տարվող աշխատանքները, մասնավորապես հիշատակեց ընտանեկան բիզնեսի զարգացմանն ուղղված արտոնությունները` հարկերից ազատումը:
Պարոն Օհանյանը նշեց, որ 2015 թվականի հիմնական ձեռքբերումը կարելի է համարել 2016-2018 թվականների ՓՄՁ ռազմավարությունը, որտեղ հստակ երեւում են այս ոլորտի զարգացմանն ուղղված քայլերը, նպատակները, միջոցառումները:
Ամփոփելով տարին՝ նա նշեց, որ շուրջ 7000 ընկերություններ փակվել են, գրանցվել են 15000 ընկերություններ, փակվողներից 2 անգամ ավելի:
Ըստ նրա՝ փակման պատճառները շատ տարբեր են. չեն կարողանում ճկուն քաղաքականություն մշակել, որ մրցակցեն, բացի այդ, դա բնական գործընթաց է. ձեռնարկությունները բացվում են ու փակվում:
Կարդացեք նաև
«Գուցե չեն ցանկացել գործունեություն ծավալել իրենց նախաձեռնությամբ, ոչ թե բացասական գործոններից ելնելով, իրենց իրավունքն է բացվել, փակվել և ընդհանրապես աշխատել, թե՝ ոչ»,-ասաց նա և խորհուրդ տվեց նայել միջազգային տենդենցները. բոլոր երկրներում էլ ՓՄՁ-ները բացվում են եւ փակվում:
Հռիփսիմե ՀՈՎՀԱՆՆԻՍՅԱՆ
