Այսօր «Արմենպրես» լրատվական գործակալությունում լրագրողների հետ հանդիպման ընթացքում Էկոնոմիկայի նախարարության գործարար միջավայրի բարելավման վարչության պետ Ալբերտ Բաբայանը նշեց, որ Հայաստանն այսօր գրավիչ երկիր է գործարար միջավայրի բարելավման տեսանկյունից: «Դրա վառ ապացույցն է այս տարի հրապարակված՝ «Գործարարությամբ զբաղվելը» զեկույցը, որի արդյունքներով Հայաստանը նախորդ տարվա համեմատ բարելավել է իր դիրքերը տասը կետով, իսկ վերագնահատված արդյունքներով՝ 3 կետով: Այս տարի Հայաստանի գործարար միջավայրը լավագույնն է ԱՊՀ երկրների շարքում եւ երկրորդը ընդհանրապես տարածաշրջանում՝ զիջելով միայն Վրաստանին»,- ասաց նա:
Ըստ նրա՝ առաջընթաց ապահոված ոլորտներից է արտաքին առեւտուրը, որը պայմանավորված է նրանով, որ անդամակցել ենք Եվրասիական տնտեսական միությանը եւ հաշվի առնելով, որ մենք համագործակցում ենք Ռուսաստանի Դաշնության հետ՝ խնայվում է սահմանային ընթացակարգերի վրա ծախսվող գումարը եւ ժամանակը:
Ըստ պարոն Բաբայանի՝ կարեւոր է, որ նախարարությունում այսօր գործում է թեժ գիծը, որը զբաղվում է ձեռնարկատիրությանը վերաբերող հարցերին ընթացք տալով: «Թեժ գծին ստացել ենք մոտ 200 դիմում կամ հարց, որոնց տրվել են հնարավորինս սպառիչ պատասխաններ»,- ասաց նա:
Ըստ նրա՝ փորձաքննության են ենթարկվում նաեւ ոլորտին վերաբերող իրավական ակտերը, վերլուծվում են դրանք եւ փորձում դրանով շտկել խնդիրները:
Հռիփսիմե ՀՈՎՀԱՆՆԻՍՅԱՆ
Մեզ մնում է ուրախանալ