Այսօր Էրեբունի եւ Նուբարաշեն վարչական շրջանների ընդհանուր իրավասության դատարանում (նախագահող դատավոր՝ Վարդան Գրիգորյան) «Օֆշորի» գործով նիստին չէր ներկայացել տուժողը եւ նրա բացակայությամբ կողմերը խուսափեցին նիստը շարունակել:
Տուժողի ներկայացուցիչը՝ Շալիկո Փիրուզյանը պնդեց, որ խնդիր չկա, նիստը կարող են շարունակել, բայց ամբաստանյալ Աշոտ Սուքիասյանի պաշտպանն ասաց, որ Փայլակ Հայրապետյանը բարդ բնավորություն ունի, հետո կարող է խնդիրներ առաջանան, ավելի լավ է առանց նրա չանեն:
Փայլակ Հայրապետյանը լրագրողների հետ զրույցում ասել էր, որ «Օֆշորի» այս գործն այնքան պարզ է, որ ցանկության դեպքում կարող են արագ մեղավորներին պատժել, բայց ձգձգում են:
Aravot.am-ի հետ զրույցում Շալիկո Փիրուզյանն ասաց, որ համաձայն չէ, թե գործն անհարկի ձգձգում են. «Դա իրոք դատավարական նորմ է, տուժողը պետք է պարտադիր ներկա գտնվի: Իսկ ինչ վերաբերում է նրան, որ նա վատ բնավորություն ունի, չէ,՛ վատ բնավորություն չունի: Փայլակ Հայրապետյանի բնավորությունը շատ լավն է, ինքը ուղղակի օբյեկտիվ է: Պաշտպանական կողմը եւ դատախազը ցանկանում էին, որպեսզի ներկա լինի, որ իր մոտ որեւէ հարց հետո չառաջանա: Միտումնավոր չեն ձգձգում»:
Կարդացեք նաև
Ինչ վերաբերում է տուժողի մյուս ներկայացուցչի՝ Ինգա Ավագյանի բացակայությանը, որը դատավորի խոսքերով անհարգալից վերաբերմունք է դատարանի նկատմամբ՝ Շալիկո Փիրուզյանն ասաց, որ նա կարող էր գոնե զանգահարել դատավորի քարտուղարուհուն եւ զգուշացնել, որ չի գալու. «Ես խցանման մեջ էի, ուշանում էի, զանգեցի: Նա չէր գալու, կարող էր զանգել, ուրիշ խնդիր չկա, միտումնավոր չի արել»:
Հռիփսիմե ՋԵԲԵՋՅԱՆ
