«Օֆշորի» գործով այսօր Էրեբունի եւ Նուբարաշեն վարչական շրջանների ընդհանուր իրավասության դատարանում (նախագահող դատավոր Վարդան Գրիգորյան) դատական նիստին չէր ներկայացել տուժողը եւ նրա ներկայացուցիչներից մեկը՝ Ինգա Ավագյանը:
Տուժողի մյուս ներկայացուցիչը՝ Շալիկո Փիրուզյանը տեղեկացրեց, որ Փայլակ Հայրապետյանը մրսել է, վատառողջ է եւ չի կարողացել գալ, իսկ Ինգա Ավագյանը մեկ այլ դատական նիստի է մասնակցում:
Դատավորը բարկացավ. «Նա արդեն երկրորդ դատական նիստն է, պատշաճ չի տեղեկացնում դատարանին, որ չի ներկայանալու: Հաջորդ անհարգելի բացակայության դեպքում կքննարկենք նրան այս գործից հեռացնելու հարցը՝ դատարանի նկատմամբ անհարգալից վերաբերմունք դրսևորելու համար: Դժվա՞ր է դիմում ներկայացնել ու ասել իր բացակայության պատճառները: Կքննարկենք, եթե գտնենք հարգելի է, կհամարենք հարգելի»:
Կարդացեք նաև
Դատարանում կողմերը վստահեցրին, որ եթե Փայլակ Հայրապետյանն էլ չի եկել, առանց տուժողի չպետք է շարունակեն նիստը: Տուժողի ներկայացուցիչը հակառակ կարծիքի էր: Ըստ նրա, այս նիստում պետք է փաստաթղթեր հրապարակվեն, դրան Փայլակ Հայրապետյանի բացակայությունը չի խանգարում. «Եթե ինչ-որ բան լինի,ես կարող եմ հաղորդել նրան»:
Սակայն մեղադրյալի՝ Աշոտ Սուքիասյանի պաշտպանի խոսքերով՝ «Մեզ ձեռք է տալիս շարունակել, բայց հաշվի առնելով տուժողի բարդ բնավորությունը, հնարավոր է խնդիրներ առաջանան, դրա համար ավելի լավ է սպասենք»:
Դատավորը որոշեց՝ «Անկախ տուժողի բնավորությունից, տուժողի ներկայությունը ապացույցների ներկայացման փուլում պարտադիր է: Նա ամեն անգամ կարծիք է հայտնում փաստաթղթերի հետ կապված, դրա համար գտնում եմ, որ այսօրվա նիստը չպետք է կայանա»:
Հաջորդ դատական նիստը նշանակվեց 2016 –ի հունվարի 14-ին ժամը 12-ին:
Դատավորը շնորհավորեց դատական նիստի մասնակիցներին գալիք Ամանորի կապակցությամբ եւ ավարտեց նիստը:
Հռիփսիմե ՋԵԲԵՋՅԱՆ
