«Նույն խեղճությունն ու նույն փախեփախն է»,- ամփոփելով 2015-ը «Հայելի» ակումբում լրագրողների հետ հանդիպմանը հայտարարեց գրականագետ Դավիթ Գասպարյանը: Նա մտահոգություն հայտնեց, թե այս ո՞ւր ենք հասցրել մեր ժողովրդին:
Ըստ պարոն Գասպարյանի՝ մի գեղեցիկ բան, եթե կա, դա Նարեկ Սարգսյանի շենքն է Շահումյանի հրապարակում՝ նախարարությունների համար կառուցված: Ըստ պարոն Գասպարյանի՝ դրանով հրապարակն ամբողջանում է:
Դառնալով մշակութային կյանքին՝ Դավիթ Գասպարյանը կրկին մտահոգություն հայտնեց. «Գրականությունը դարձել է Չարբախի ձորում կործած մի բան: Ո՞վ է ձեռքը գիրք վերցնում»:
Քանդակագործ Ֆերդինանտ Առաքելյանը նկատեց, թե ծանր տարի էր հայ ժողովրդի համար և կարծում է, որ հաջորդ տարի էլ ծանր կլինի. «Մեզ մոտ պակասում է վստահությունը: Աշխարհի ամենածանր բանն այն է, որ երեխան կորցնում է վստահությունը ծնողի, ժողովուրդը պետության նկատմամբ: Հերիք է՝ ինչքան լսեցիք քաղաքական գործիչներին, մի քիչ էլ լսեք մտավորականներին»: Պարոն Առաքելյանը հորդորում է ստամոքսից քիչ խոսել, այլ ավելի շատ խոսել երկիրը կառուցելու մասին:
Կարդացեք նաև
Մտավորականները պատասխանեցին «տարվա ամենամեծ» ավանտյուրա հարցին: Պարոն Առաքելյանը նկատեց. «Ոտից գլուխ ավանտյուրա է: Ինձ ցնցեց Ծառուկյանի հետ դեպքը: Խաժամուժ էր հավաքվել այնտեղ: Մեկ ակնթարթ ու վտանգ կար: Մի մոռացեք, որ մեկ ակնթարթում սկսվեց համաշխարհային պատերազմը: Ծառուկյանն իրեն ճիշտ պահեց, քանի որ իրեն շահագործում էին»:
Դավիթ Գասպարյանի բնութագրմամբ՝ «տարվա ավանտյուրան» ընտրություններն էին:
Տաթև ՀԱՐՈՒԹՅՈՒՆՅԱՆ
