«Մինչեւ հիմնավորում եւ բացատրություն չտա, թե ինչի համար է նման ծախս տվել, չենք հաստատի»,-այսօր կառավարության նիստում ասաց վարչապետ Հովիկ Աբրահամյանն՝ արձագանքելով Տարածքային կառավարման եւ արտակարգ իրավիճակների փոխնախարար Վաչե Տերտերյանին, որը ներկայացնելով կառավարության նախագիծը, ասաց, որ լրացուցիչ 10 միլիոն դրամ է անհրաժեշտ Արմավիրի մարզպետարանում 2015 թվականի ամռան շոգ ամիսներին օդորակիչների շահագործման, ինչպես նաեւ մարզպետարանի համակարգչային տեխնիկայի եւ սարքավորումների թվաքանակի ավելացման արդյունքում առաջացած էլեկտրաէներգիայի ծախսի համար:
Վաչե Տերտերյանն առաջարկեց «Կրթական օբյեկտների հիմնանորոգում» ծրագրով մրցույթների արդյունքով առաջացած 8 միլիոն 400 հազար դրամ տնտեսված գումարի հաշվին մարել ծախսված էլեկտրաէներգիայի պարտքը:
Սակայն վարչապետը չհամաձայնեց կրթական օբյեկտների հիմնանորոգման ծրագրի գումարը էլեկտրաէներգիայի ծախսին ուղղել: Նա հայտարարեց. «Ինչ է նշանակում լրացուցիչ օգտագործել են: Մինչեւ չհիմնավորվի՝ ես սա չեմ ստորագրի 100 հազար դրամ չի, 200 հազար դրամ չի»:
Լուսինե ԲՈՒԴԱՂՅԱՆ
