Հաճախ համացանցում, հատկապես «Համադասարանցիներ» եւ «Ֆեյսբուք» սոցիալական ցանցերում հանդիպում ես լուսանկարների, որոնց հեղինակները կոչ են անում՝ «Լայքիր», եթե հարգում ես»: Դրանք հիմնականում վերաբերում են հայոց բանակին կամ զինվորներին: Նկարները տարածողները կարծում են, որ դա է իրական հարգանքը: Թեման վիճահարույց է, կարծիքները՝ տարբեր:
Ավագ դպրոցի աշակերտուհի Թագուհի Նալբանդյանը նշում է, որ «Մեկ լայքը ոչինչ է այն հարգանքի դիմաց, որ մենք տածում ենք հայ զինվորի նկատմամբ եւ մի՞թե հենց like-ն է հարգանքի լավագույն դրսեւորումը»:
Ուսանողուհի Աիդա Պետրոսյանը կարծում է, որ որեւէ լուսանկար սոցցանցում հավանության արժանացնելը մարդու ցանկության հարց է, եւ եթե օգտատերը նման ցանկություն չունի, չի կարելի նրանից դա պարտադրաբար «կորզել»:
Իրավաբան Հրաչ Նալբանդյանն էլ փաստում է, որ սոցցանցերի հետ կապված շատ հարցեր իրավական տեսանկյունից դեռ կարգավորված չեն, վիրտուալ տարածքում հնարավոր չէ «լայք» պարտադրողներին «պատժել»:
Կարդացեք նաև
Մեկ այլ իրավաբան էլ, որ չցանկացավ անունը հրապարակենք, ասաց, որ լուսանկարներ տարածելու մեջ ոչ մի վատ բան չի տեսնում, օգտատերի նախասիրության հարց է, իսկ ով չի ցանկանում, թող հավանության չարժանացնի դրանք: Հրաչ Նալբանդյանն էլ հավելեց, որ զինվորների նկարներ տարածողների թվում շատ են նրանց հարազատները եւ նման նկարներ տարածվում են զինծառայողների թույլտվությամբ:
Զինծառայողների հետ եւս զրուցեցինք: Նրանցից ոմանք ասացին, որ դեմ չեն իրենց լուսանկարների տարածմանը, այլ հարց է, որ ոչ մի զինվոր like-ը հարգանքի նշան չի համարում:
Բլոգեր Տիգրան Քոչարյանից էլ մեկնաբանություն խնդրեցինք: «Եթե մահացած զինվորի նկարը տարածում են առանց նրա ծնողների թույլատրության, դա նրանց կրկնակի ցավ է պատճառում եւ ամեն դեպքում «լայք» հավաքել այդպիսի նկարներով, առնվազն կոռեկտ չէ: Եթե ենթադրենք՝ որեւէ զինվոր սխրանք է գործել, այդ դեպքում տարածումը կարող է նաեւ ճանաչողական բնույթի լինել եւ դրանք տարածվեն անգամ լուրջ կայքերում՝ գիտակցելով, թե ինչի համար են «լայք» հավաքում»: Բլոգերը նաեւ ընդգծեց. «Եթե զինվորի ծնողներից կամ հարազատներից համաձայնություն չեն ստացել նրանց նկարները տարածողները, ապա ծնողները կարող են դիմել դատարան՝ պահանջելով բարոյական վնասի փոխհատուցում»:
ՀԵՂԻՆԵ ՂԱՆԴԱԽՉՅԱՆ
ԵՊՀ ժուռնալիստիկայի ֆակուլտետի ուսանողուհի
«Առավոտ» օրաթերթ
23.12..2015
