Թունավորումը հիմնականում խմիչքը խառնելուց եւ չափն անցնելուց է լինում: Ամանորի նախաշեմին քաղաքացիներին զգուշացնում է հանրապետության գլխավոր թունաբան Միքայել Գաբրիելյանը:
Այսօր «Sputnik-Արմենիա» մամուլի կենտրոնում պարոն Գաբրիելյանը հորդորեց դիմել հիվանդանոց, եթե ալկոհոլից թունավորում է լինում եւ մարդը գիտակցությունը կորցնում է, իսկ տան պայմաններում կարելի է ստամոքսի լվացում անել, եթե վիճակն այդքան էլ վատ չէ:
Թունաբանի խոսքերով, խմիչքն օգտագործելու կոնկրետ չափ գոյություն չունի, որից մարդը վատ կզգա, ամեն ինչ օրգանիզմի առանձնահատկությունից է կախված. «Մարդ կա 50 գրամից էլ կվատանա, մարդ կա կես լիտր կարող է խմել եւ ոչինչ չլինի»:
Ըստ նրա, գնալով երիտասարդանում է ալկոհոլից թունավորվողների տարիքը: Պատճառներից մեկը պարոն Գաբրիելյանը համարում է այն, որ. «Եթե նախկինում ամանօրյա տոները երիտասարդները ընտանիքում էին անցկացնում, ապա հիմա նախընտրում են դրսում նշել եւ մեծահասակների ուշադրությունից դուրս են մնում»:
Կարդացեք նաև
Պատասխանելով Aravot.am-ի հարցին, թե Հայաստանում ինչպիսի՞ն է օղիների որակը եւ արդյոք տեղական արտադրության էժանագին օղիներից թունավորումներ հաճախ են լինում, պարոն Գաբրիելյանն ասաց, որ մեր երկրում վտանգավոր բաղադրությամբ, վտանգավոր սպիրտով օղի չկա, ինչպես օրինակ` Ռուսաստանում, որի հումքը կարող է լինել էթիլային սպիրտը: Թունաբանը չի հիշում, թե վերջին անգամ մեզ մոտ երբ է օղուց թունավորմամբ մարդ տեղափոխվել հիվանդանոց:
Հետաքրքրվեցինք նաեւ, թե սնկի թունավորումից այս տարի քանի՞ մարդ է տուժել:
Միքայել Գաբրիելյանն ասաց, որ սնկից թունավորումները պակասել են, չնայած որ այս տարի երկու մահվան դեպք է գրանցվել, որոնք թունավորվել են դաշտի սնկերից:
Սնկից մեր քաղաքացիները հիմնականում թունավորվում են գարնանը եւ աշնանը:
Անդրադառնալով բոտուլիզմին, հանրապետության գլխավոր թունաբանը կրկին կոչ արեց խուսափել տան պայմաններում պահածո պատրաստելուց, հիշեցնելով, որ բոտուլիզմով վերջին թունավորումը մոտ տաս օր առաջ է եղել. ընտանիքը թունավորվել է կարմիր պղպեղի պահածոյից: Եթե, այնուամենայնիվ, պահածո են պատրաստում, պարոն Գաբրիելյանը խորհուրդ տվեց եռացնել դրանք, նոր` օգտագործել:
Լուսինե ԲՈՒԴԱՂՅԱՆ
