Արվեստագետներից ոմանք խուսափում են լրագրողների հետ հանդիպումից, մոռանալով, որ փոքր քաղաքում ենք ապրում, հետեւաբար ամեն ինչ շատ արագ իմացվում է: Օրինակ, օպերային երգչուհի, մեցցո սոպրանո Ինգա Կարապետյանցի՝ «ճապոնական» բեմելի չկայանալու լուրն էլ գաղտնիք չէր մնացել:
Ալ. Սպենդիարյանի անվան օպերայի եւ բալետի ազգային ակադեմիական թատրոնում սեպտեմբերին կայացած Բիզեի «Կարմեն» օպերայի պրեմիերայից հետո՝ օրերս հանդիպեցինք հարցազրույցից խուսափող, գլխավոր դերերգով հանդես եկած Ինգա Կարապետյանցի հետ: Նա համառ պնդումներից հետո հաստատեց մեր ունեցած տեղեկությունը: «2010թ. վերջերին Ամստերդամում, լսումների արդյունքում արժանացա Զալցբուրգի հեղինակավոր փառատոնի կազմակերպիչներից Էվա Մարիա Վիսերի ուշադրությանը: Նա բարեխոսեց ինձ աշխարհահռչակ դիրիժոր Ռիկարդո Մուտիի մոտ: Ուղեւորվեցի Հռոմի օպերային թատրոն եւ մաեստրոյին ներկայացա Ֆենենայի դերերգով՝ Վերդիի «Նաբուկո» օպերայում: Սա արդեն 2011-ի սկզբներին էր, եւ այդ ժամանակ Վիեննայից ժամանած պրոդյուսերական մի խումբ նախատեսում էր 40-օրյա փորձերից հետո «Կարմեն» օպերայի տուրնեն Ճապոնիայի քաղաքներում: Ընդ որում, 20 մեցցո սոպրանոյից որպես Կարմեն երկու հոգու ընտրեցին՝ ավստրիացի մի երգչուհու եւ ինձ: Հյուրախաղերը Ճապոնիայում այդպես էլ չկայացան, բայց ոչ թե ստեղծագործական, այլ խոշորամասշտաբ բնական աղետի պատճառով»,- ասաց երգչուհին: Հետո էլ հավելեց, թե վերը նշված նախագծի հեղինակ-ռեժիսորը կուլիսներից՝ իր դուրս գալուն պես բարձրաձայն ասել է՝ «Ահա Կարմենը»:
Տեսարան՝ «Կարմենից»:
Հետաքրքրվեցինք՝ իսկ Ռիկարդո Մուտին ի՞նչ գնահատականի է արժանացրել հայ օպերային երգչուհու կատարմամբ Ֆենենայի դերերգը: Ինգա Կարապետյանցը նշեց. «Ես դրամատիկ եմ ոչ միայն ձայնով, այլեւ կերպարների առումով: Իսկ Ֆենենան լիրիկական է, իմ ներաշխարհին չհամապատասխանող…»:
Երգչուհին չի սիրում խոսել իր անցած ստեղծագործական ուղուց, էլ չենք ասում՝ գալիք ծրագրերի մասին: Այդուհանդերձ, նա մասամբ հաստատեց մեզ հասած լուրը, թե իրեն լսել է աշխարհահռչակ մեկ այլ դիրիժոր՝ Դանիել Բարենբոյմը: «2007թ. մասնակցեցի «Վագներյան ձայներ» միջազգային մրցույթին, որտեղ ժյուրիի նախագահն էր հանրահայտ «Սիեթլ» օպերային թատրոնի ղեկավարներից Սփայթ Ջեյնքինսը եւ հրեա դիրիժոր Աշեր Ֆիշը: Այդ ժամանակ ես շա՜տ երիտասարդ էի: Կատարեցի Ֆրիկայի դերերգը Վագների «Վալկիրիա» օպերայից: Ոչ թե Բարենբոյմի, այլ նրա ասիստենտ Ժուլյեն Սալմենկուրի հետ եմ պատրաստել այս դերերգը եւ ներկայացել»,- մանրամասնեց երգչուհին:
Կարդացեք նաև
Անդրադառնալով երեւանյան «Կարմենին», Ինգա Կարապետյանցը ժպտալով հավելեց, թե չստացվեց ճապոնականը, փոխարենը ուրախ է, որ Երեւանի թատրոնում կայացած պրեմիերային առաջինը ինքն է երգել Կարմեն: «Թատրոնի գեղարվեստական ղեկավար Գեղամ Գրիգորյանը ձայների գիտակ է, հավանություն եւ հնարավորություն է տալիս երգիչներին, որոնք ունեն իսկապես օպերային ձայներ, իսկ այդ ձայներն էլ պետք է լինեն հնչեղ եւ առողջ»: Նշեց նաեւ, որ 2005թ., երբ ինքն ընդունվում էր օպերային թատրոն, հենց Գեղամ Գրիգորյանի մոտ է անցել վարպետության դասեր եւ նրա ղեկավարությամբ պատրաստել է Ամներիսի դերերգը Վերդիի «Աիդա» օպերայում:
ՍԱՄՎԵԼ
ԴԱՆԻԵԼՅԱՆ
Լուսանկարում` Ինգա Կարապետյանցը՝ Ռիկարդո Մուտիի հետ:
«Առավոտ» օրաթերթ
22.12..2015
