Ժուռնալիստների «Ասպարեզ» ակումբի խորհրդի նախագահ Լեւոն Բարսեղյանն ընդդեմ ոստիկանության հայցով դատավճիռը կհրապարակվի հունվարի տասներկուսին: Լեւոն Բարսեղյանը պահանջում է ոստիկանությունից բարոյական վնասի փոխհատուցում մոտ երկու հազար եվրոյի չափով:
Հիշեցնենք, որ Լեւոն Բարսեղյանի հայցը 2012-ի սեպտեմբերի 21-ին բերման ենթարկվելու գործի շարունակությունն է: Բարսեղյանը անկախության շքերթի ցուցարարներից էր ու բողոքում էր օտար զորքի, օտար դրոշի առկայությունից: Նրան այդ օրը բերման էին ենթարկել ու երեք ժամ պահել ոստիկանությունում:
Լեւոն Բարսեղյանը դեպքից հետո դիմել էր դատարան՝ իր խոսքի, ազատ տեղաշարժի ու հավաքների ազատության իրավունքի խոչընդոտումը ոստիկանության կողմից ճանաչելու հայցով: Դատարանը ավելի քան մեկ տարի գործը քննելուց հետո բավարարել էր Բարսեղյանի հայցը: Այս գործի հետքերով, պարոն Բարսեղյանը հիմա բարոյական փոխհատուցում է ուզում ոստիկանությունից: Մեզ հետ զրույցում ասաց, որ հայաստանյան բոլոր դատական ատյաններից հետո կդիմի եվրադատարան:
Լեւոն Բարսեղյանի փաստաբան Արտակ Զեյնալյանը մեզ հետ զրույցում ասաց, որ «Նախորդ դատական նիստը հետաձգվել էր, որ ոստիկանության ներկայացուցչի միջնորդության հիման վրա, որ կարողանա եզրափակիչ ճառով հանդես գալ: Դատարանը բավարարել էր, բայց այսօր ոստիկանության ներկայացուցիչը դատարան չէր ներկայացել, ուղարկել էր երկու էջանոց փաստաթուղթ կամ դիրքորոշում էր կամ չգիտեմ՝ ինչ, որովհետեւ անորոշ էր, թե ինչ կարգավիճակ ուներ այդ փաստաթուղթը, որով ուղղակի ասում էր, որ ենթակա է փոխհատուցման միայն անազատության եւ անձեռնմխելիության իրավունքի խախտման եւ գրել էր, որ ընդամենը երեք ժամ տասնհինգ րոպե Լեւոն Բարսեղյանն անազատության մեջ գտնվել, իսկ դա շատ կարճ ժամանակ է ու փոխհատուցման գումարը շատ փոքր պետք է լինի: Գրել էր նաեւ, որ մեր պահանջած փոխհատուցման գումարներն ուռճացված են, իսկ թե ինչու են ուռճացված, հիմնավորված չէր»:
Կարդացեք նաև
Արփինե ՍԻՄՈՆՅԱՆ
