Կայացել է ՀՀ սփյուռքի նախարարին կից ատյանի նիստը

Դեկտեմբերի 22-ին ՀՀ սփյուռքի նախարարությունում կայացավ նախարարին կից ատյանի հերթական նիստը: Քննարկվեց  երեք հարց:

Հայաստանի Հանրապետության սփյուռքի նախարարության աշխատակազմի 2016 թվականի աշխատանքային ծրագրերի և 2016 թվականին  ՀՀ Սփյուռքի նախարարին կից ատյանում քննարկվելիք հարցերի վերաբերյալ զեկուցեց սփյուռքի նախարարության աշխատակազմի ղեկավար  Ֆ. Զաքարյանը: Զեկուցողը նշեց, որ 2016 թվականին ևս իրականացվելու են սփյուռքահայերի ինտեգրման, սփյուռքի երիտասարդների  հայրենաճանաչության «Արի տուն»,«Սփյուռք» ամառային դպրոց ծրագրերը, «Իմ Հայաստան» համահայկական փառատոնը:Ֆ. Զաքարյանը շեշտեց, որ սփյուռքի նախարարության բյուջեն ուղղորդվել է կրթամշակութային, սփյուռքահայերի ինտեգրման, խորհրդաժողովների կազմակերպման, Հայաստան-Սփյուռք գործակցության զարգացմանն ուղղված ծրագրերի իրականացմանը: Զեկուցողը ներկայացրեց 2016թ. ՀՀ սփյուռքի նախարարության գործունեության ծրագիր ժամանակացույցը:

Նախարարը կարևորեց նախարարության աշխատակազմի hամակարգված աշխատանքը, հավելեց, որ անհրաժեշտ է նշել 2016 թ. նախատեսված աշխատանքների ոչ միայն ժամկետները, նաև՝ պատասխանատուներին և արդյունքները:

Համագործակցության հուշագիր կնքած կազմակերպությունների հետ 2015 թ. իրականացրած ծրագրերի եւ միջոցառումների վերաբերյալ զեկուցեց համահայկական և միջազգային կազմակերպությունների հետ կապերի բաժնի պետ Անահիտ Դավթյանը:

Զեկուցողը նշեց, որ ի կատարումն ՀՀ Նախագահի հանձնարարականի՝ 2014թ. սկսա՝ծ ՀՀ սփյուռքի նախարարությունը համահայկական տարբեր կազմակերպությունների՝ Ռուսաստանի հայերի միության և Համաշխարհային հայկական կոնգրեսի, Համազգային հայ կրթական և մշակութային միության, Հայ մարմնակրթական ընդհանուր միության, Հայ օգնության միության, «Գալուստ Կյուլպենկյան» հիմնարկության, «Երկրապահ կամավորականների միություն» հասարակական կազմակերպության հետ կնքել է համագործակցության հուշագրեր և համաձայնագրեր: Անդրադարձ կատարվեց հուշագրերի ու համաձայնագրերի շրջանակներում իրագործված ծրագրերին ու միջոցառումներին: Ներկայացվեցին նաև 2016թ. նախատեսված միջոցառումները: Կարևորվեց «Համաշխարհային հայկական կոնգրես» և «Ռուսաստանի հայերի միություն» ՀԿ-ների հետ համատեղ անցկացվող «Հայապահպանության գործում նշանակալի ավանդի համար» համահայկական ամենամյա մրցանակաբաշխությունը, Համազգային հայ կրթական և մշակութային միության հետ համատեղ՝ Կարո Սասունուն նվիրված գիտաժողովի կազմակերպումը, ԱՄՆ Համազգայինի «Սայաթ-Նովա» երգչախմբի և Մոնրեալի Համազգայինի «Պետրոս Ադամյան» թատերախմբի հյուրախաղերի կազմակերպումը Հայաստանում, «Գալուստ Կյուլպենկյան» հիմնարկության հետ՝ կազմակերպության 60-ամյակին նվիրված                ձեռնարկների կազմակերպումը, Հայ օգնության միության հետ՝ ՀՕՄ-ի հայաստանյան գրասենյակի 25-ամյակի հանդիսության կազմակերպումը: Զեկուցողը նշեց, որ 2016թ. հուլիս-օգոստոս ամիսներին նախատեսվում է «Աշխարհի առաջնակարգ համալսարաններում սովորող հայ ուսանողների համաժողով»՝ «Համազգային հայ կրթական և մշակութային միության»,  «Գալուստ Կյուլպենկյան» հիմնարկության, ՌՀՄ ՀՀԿ և ՀՄԸՄ աջակցությամբ:

Մերձավոր Սփյուռքի հետ կապերի վարչության հաշվետվությունը ներկայացրեց մերձավոր Սփյուռքի հետ կապերի վարչության պետ Տ. Շագոյանը: Զեկուցողը նշեց, որ վարչության գործունեության առանցքային ուղղությունը «Աջակցություն մերձավոր սփյուռքին» ծրագրի իրականացումն  է, ինչպես նաև տարածաշրջանի երկրների հայ­կա­կան համայնքներին մշտապես աջակցություն ցուցաբերելը, Սփյուռքի նախարա­րության ծրագրերին նրանց մասնակցության ապահովումը։ Մերձավոր սփյուռքի հետ կապերի վարչությունը համակարգում է Վրաստանի, Թուր­քիայի, Աբխազիայի, Հյուսիսային Կովկասի՝ Ադըղեայի, Կաբարդինո-Բալկարիայի, Դա­ղ­ս­տանի, Կարաչաևո-Չերկեսիայի, Հյուսիսային Օսիա-Ալանիայի, Հարավային Օսե­թիայի, Ինգուշեթիայի, Չեչենական Հանրապետությունների և Ստավրոպոլի երկրա­մասի հայ համայնքների հետ կապը և «Հայրենիք-Սփյուռք» գոր­ծակցությունը:

Ամփոփելով 2015թ. վերջին նիստը՝ ՀՀ սփյուռքի նախարար Հրանուշ Հակոբյանն անդրադարձավ նախորդ մեկ ամսվա ընթացքում կատարված աշխատանքներին, անցած տարվա ձեռքբերումներին ու բացթողումներին,  և կարևորեց սերտ կապն ու համագործակցությունը Սփյուռքի բոլոր հայ համայնքների հետ այդ ուղղությամբ նախարարության վարչությունների կազմակերպված ու համակարգված աշխատանքի անհրաժեշտությունը:

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՍՓՅՈՒՌՔԻ ՆԱԽԱՐԱՐՈՒԹՅՈՒՆ