Այսօր Ազատության հրապարակում մեկնարկած «Նոր Հայաստան» շարժման քաղաքացիական հանդիպման ժամանակ Ժիրայր Սեֆիլյանից հետաքրքրվեցին, թե ինչ կարծիք ունի ՊՆ նախկին փոխնախարար Վահան Շիրխանյանի ձերբակալման մասին:
Նա պատասխանեց. «Առհասարակ մի խումբ քաղաքացիների այդ ձերբակալությունը, որ տեղի ունեցավ, առաջին օրվանից շատերի մոտ անլուրջ զգացողություն առաջացրեց: Իմ կարծիքով, շարունակվում է այդ անլրջությունը: Գործող ռեժիմն իր ԱԱԾ աշխատակիցներով շուտվանից այդ վստահությունը չունեն ժողովրդի մոտ: Որ այդ գործի ծալքերում կա քաղաքական աստառ՝ ես չեմ կասկածում: Նույնպես Վահան Շիրխանյանի ձերբակալությունը հարց է առաջացնում: Խմբին ձերբակալեցին, 25-26 օր հետո նոր իմացան, որ պարոն Շիրխանյանը ներքաշված է այդ ամեն ինչում: Հարց է առաջանում, եթե Վահան Շիրխանյանը ներքաշված լիներ այդ գործում, նա կմնա՞ր Հայաստանում»:
Ըստ Ժիրայր Սեֆիլյանի, այնքան խճճված է այս գործը, որ ռեժիմը սրա տակից չի կարողանալու դուրս գալ. «Երբ վստահություն չկա, նույնիսկ եթե ԱԱԾ մարմինները ճշմարիտ գործեն ապագայում՝ մեր ժողովուրդը չի հավատա: Նրանք սպառել են իրենց»:
Հռիփսիմե ՋԵԲԵՋՅԱՆ
