Հարցազրույց ԼՂՀ նախագահի մամուլի խոսնակ ԴԱՎԻԹ ԲԱԲԱՅԱՆԻ հետ
-Ինչպե՞ս կբնութագրեք այսօր ստեղծված իրավիճակը։
-Ընդհանուր առմամբ, իրավիճակն այսպիսին է. ներկայումս խոսել կարգավորման ինչ-որ սցենարների մասին պարզապես հնարավոր չէ, քանի որ հիմնական շեշտը պետք է դրվի հակամարտության գոտում խաղաղության, կայունության պահպանման վրա: Եվ այս տրամաբանությամբ են այժմ ընթանում բանակցությունները, այդ թվում եւ Շվեյցարիայում անցկացված հանդիպումը:
Ռազմական առումով հայկական բանակը Ադրբեջանին ամեն օր իր տեղն է դնում, որքան էլ նա խախտի զինադադարի ռեժիմը, որքան էլ փորձի ներխուժել Արցախի ու Հայաստանի տարածք: Մնում է, որ միջազգային հանրությունը քաղաքական առումով եւս Ադրբեջանին իր տեղը ցույց տա:
Կարդացեք նաև
-Հաճախ է ասվում, թե բանակցություններին այլընտրանք չկա, որ այլընտրանքը պատերազմն է: Բայց չե՞ք կարծում, որ այլընտրանք կարող է լինել տարածաշրջանային խաղացողների կողմից Ադրբեջանի դեմ տնտեսական, քաղաքական պատժամիջոցների կիրառումը:
-Միջազգային հանրությունն ուզում է ավելի չթեժացնել իրավիճակը: Նրանք կարծում են, թե Ադրբեջանի հետ քաղաքակիրթ երկխոսություն վարելով՝ նրանից կարող են քաղաքակիրթ պահվածք ակնկալել: Բայց պատմության մեջ դեռեւս չի եղել այնպիսի դեպք, երբ հանցագործը կամ ահաբեկիչը քաղաքակիրթ լեզուն հասկանա: Հարկավոր են գործնական քայլեր, ինչպես նշեցիք` պատժամիջոցների տեսքով, եւ ես այդ քայլերն արդեն նշմարում եմ:
-Եվ որո՞նք են դրանք:
-Խոսքս մասնավորաբար ԱՄՆ Կոնգրեսի վերջերս ընդունած բանաձեւի մասին է, ուր կոչ է արվում վիզաներ չտրամադրել ալիեւյան կլանի որոշ ներկայացուցիչների: Կամ այն, որ մարդու իրավունքների պաշտպան կազմակերպությունները հրապարակում են քննադատական նյութեր Ադրբեջանում տիրող խայտառակ իրավիճակի մասին: Չնայած սրանք բավարար քայլեր չեն, ու դրանցով չպետք է սահմանափակվել:
Այսինքն՝ անհրաժեշտ է, որ միջազգային հանրության կողմից լինեն ավելի հստակ մեսիջներ: Կարծում եմ՝ երբ Բաքուն մոտենա «կարմիր գծին», այդ ազդանշաններն ուզած-չուզած լինելու են: Այսօր չեն դիմում ավելի կոնկրետ պատժամիջոցների, որովհետեւ համոզված են, որ Ալիեւը չի խախտի կարմիր գիծը, այսինքն` լայնածավալ պատերազմ չի սկսի:
Մյուս կողմից՝ Ադրբեջանը լայնածավալ պատերազմ չի սկսի մի շարք պատճառներով: Առաջին՝ Հայաստանի, Արցախի ու Ադրբեջանի զինված ուժերի միջեւ պահպանվում է հավասարակշռությունը: Երկրորդ՝ միջազգային հանրությունը դեմ է լայնածավալ պատերազմին: Երրորդ՝ Ադրբեջանն ինքը շահագրգռված չէ պատերազմով, որովհետեւ փխրուն պետություն է, եւ նման պատերազմի դեպքում ազգային փոքրամասնությունները հաստատ ոտքի կկանգնեն, իսկ այդ զարգացումները կհանգեցնեն Ադրբեջան պետության փլուզման:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
