Սյունիքի մարզպետ Սուրիկ Խաչատրյանի ազգականների մասնակցությամբ տեղի ունեցած ծեծկռտուքի գործով այսօր նախնական դատական նիստը հետաձգվել է տուժողների բացակայության պատճառով: Դատական նիստին չէր ներկայացել նաեւ տուժողների ներկայացուցիչը:
Հաջորդ դատական նիստը նշանակվել է եկող տարվա հունվարի 26-ին:
Այս գործով ամբաստանյալի կարգավիճակում է 6 անձ՝ Սուրիկ Խաչատրյանի եղբայրը՝ Սեյրան Խաչատրյանը (Աղալար), նրա որդին՝ Էյներ Խաչատրյանը, Սուրիկ Խաչատրյանի մյուս եղբոր՝ Սերոբ Խաչատրյանի (Հոպոպ) որդին՝ Մայիս Խաչատրյանը, մարզպետի վարորդ Արագած Ղեւոնդյանի որդին՝ Դերենիկ Հակոբյանը, և վերջիններիս ընկերներ Շահում Դավթյանը, Յուրի Մանուչարյանը:
Մեղադրական եզրակացության համաձայն` մայիսի 2-ին Սյունիքի մարզի Գորիս քաղաքի Սդղի գյոլ տանող ճանապարհի խաչմերուկի մոտ ամբաստանյալները ծեծի են ենթարկել Մուշեղ Զաքարյանին և նրա առողջությանը դիտավորությամբ պատճառել միջին ծանրության վնաս: Յուրի Մանուչարյանն ու Մայիս Խաչատրյանը կալանավորված են, Շահում Դավթյանը, Դերենիկ Հակոբյանը գրավի դիմաց ազատ են արձակվել, իսկ Սեյրան եւ Էյներ Խաչատրյանների նկատմամբ խափանման միջոց է ընտրվել ստորագրությունը չհեռանալու մասին:
Կարդացեք նաև
Ամբաստանյալներից երեքի՝ Սյունիքի մարզպետ Սուրիկ Խաչատրյանի եղբոր՝ Սեյրան Խաչատրյանի (Աղալար), նրա որդու՝ Էյներ Խաչատրյանի, Սուրիկ Խաչատրյանի մյուս եղբոր՝ Սերոբ Խաչատրյանի (Հոպոպ) որդու՝ Մայիս Խաչատրյանի փաստաբան Արմեն Մելքոնյանը մեզ հետ զրույցում ասաց, որ. «Իմ պաշտպանյալներից երեքի արարքում հանցակազմ չկա, մեկի արարքը սխալ որակված է»:
Մեր հարցին, ո՞ր երեքին նկատի ունեք, որոնց արարքում հանցակազմ չկա եւ որ մեկի արարքն է սխալ որակվել, փաստաբանն ասաց. «Չեմ ուզում հիմա ասել»:
Արփինե ՍԻՄՈՆՅԱՆ
