Հասարակությունը պետք է լավ հիշի 2014թ. հունվարի 20-ին Երևանի քաղաքապետի գործակարգավարական աշխատանքային խորհրդակցության ժամանակ մանկապարտեզներում սննդի անբավարար որակի մասին վերահսկողության վարչության պետի զեկույցի բարձրացրած աղմուկը, որին հետևեց Երևանի քաղաքապետի նախաձեռնությունը՝ «Հ.Ա.Ն.Ս.-ՖՈՒԴ» ՍՊԸ, «Հեփի ֆուդ» ՍՊԸ, «Անանո» ՍՊԸ, «Հալալ Միս» ՍՊԸ 4 կազմակերպություններին գնումների բողոքարկման խորհրդում պաշտոնական ընթացակարգով ֆիննախի սև ցուցակում ընդգրկելու վերաբերյալ, սակայն այդ կազմակերպությունները ոչ միայն չեն հայտնվել վերոնշյալ ցուցակներում, այլև 2015թ. կրկին մասնակցել են մանկապարտեզների սննդի գնման գործընթացի մրցույթին, իսկ «Հալալ Միս» ՍՊԸ-ի անունը ոչ թե գնումների գործընթացին մասնակցելու իրավունք չունեցող կազմակերպությունների ցանկում է հայտնվել, այլ գնումների գործընթացին մասնակցելու իրավունքը սահմանափակված ընկերություններ ցուցակի մեջ է և զրկվել է մեկ տարով՝ 29.12.2014թ.-29.12.2015թ., այն էլ 2014-ի փետրվարին Երևանի քաղաքապետի արած առաջարկությունից 10 ամիս անց: Այսինքն, քաղաքապետարանի հայտարարած գնումների մոտակա գործընթացին դեկտեմբերի 29-ից հետո կարող է մասնակցել մի կազմակերպություն, որը տեխնիկական բնութագրերին անհամապատասխան սնունդ էր մատակարարել մանկապարտեզներին:
Սահմանված կարգով գնումների գործընթացին մասնակցելու իրավունք չունեցող 8 կազմակերպությունների մի ցուցակ էլ նոր եմ ստացել՝ «Մեգա-Պեյպեր» ՍՊԸ, «Հայաստանի ազգային արխիվ» ՊՈԱԿ, «Տեսակենտրոն» ՍՊԸ, «Էվրի դեյ» ՓԲԸ, «Սոս 97» ՍՊԸ, «Դավիթշին» ՍՊԸ , ԱՁ Էդուարդ Առուստամյան, «Դավիթ-84» ՓԲԸ, որոնց գործունեության ոլորտի մասին տեղեկություն չի տվել քաղաքապետարանի համապատասխան մարմինը: Այստեղ շատ անհասկանալի է «Հայաստանի ազգային արխիվ» ՊՈԱԿ-ի անվան առկայությունը, տեսնես ի՞նչ ոլորտում է գնումների մրցույթի մասնակցել այս պետական շահույթ չհետապնդող կազմակերպությունն ու ի՞նչ խախտումների պատճառով է առաջարկվել այդ անունը սև ցուցակում ընդգրկել:
Հիմա ո՞նց հավատանք այս սև ցուցակներին:
Անահիտ Բախշյան
Երևանի ավագանու «Բարև Երևան»
Խմբակցության անդամ
