Այսօր կառավարության հրավիրած ԱԺ արտահերթ նիստում «Ավտոմոբիլային տրանսպորտի մասին» օրենքում փոփոխություններ կատարելու մասին նախագծի քննարկման ժամանակ «Ժառանգության» պատգամավոր Զարուհի Փոստանջյանն անդրադարձավ Սահմանադրական հանրաքվեին եւ ընտրակեղծարարության մեջ մեղադրեց Մաքսիմ Հակոբյանին:
Նա նախ խոսեց Նաիրա Զոհրաբյանի մեղադրանքների մասին, որ՝ ձեր հանձնաժողովի անդամները դափոններով ծախվել են: Տիկին Փոստանջյանն էլ նշեց, որ նույնիսկ այն ընտրատեղամասերում, որտեղ ունեցել են 3 ներկայացուցիչներ՝ հանձնաժողովականներ, վստահված անձինք, ընտրակեղծարարություն է էլի տեղի ունեցել, որովհետեւ ՀՀԿ-ն բանեցրել է ճնշումների մեխանիզմը. «ՀՀԿ-ն կարողացել է կաշառել ժողովրդին , ճնշում բանեցնել: Դրա վառ ապացույցը այն մեր գործընկերն է, որն ընտրված է 38 ընտրատեղամասից: 38 ընտրատեղամասում մենք ունեինք եւ հանձնաժողովի անդամներ, եւ վստահված անձինք: Ընտրատեղամասում կեղծիքը տեղի չի ունեցել, այլ տեղի է ունեցել ընտրակաշառք բաժանելու միջոցով: Ընտրակաշառք բաժանելու միջոցը եղել է Զանգեզուրի պղնձամոլիբդենայինի այն ժամանակվա գործող տնօրեն Մաքսիմ Հակոբյանը, ով բաժանել է տվյալ անձի համար գումար, որ նա գա խորհրդարան եւ որեւիցե ծպտուն չհանի, չներկայացնի 38-րդ ընտրատարածքի հանրության շահերը»:
Ըստ նրա, սա լինելու է նաեւ 2017-ի հերթական ընտրություններին, ուստի պետք է գնալ արտահերթ ընտրությունների. «Որպեսզի գոնե ունենանք 2 մլն բնակչություն եւ կարողանանք պաշտպանել մեր սահմանները, պետք է գնալ արտահերթ ընտրությունների»:
Կարդացեք նաև
Թիվ 38 ընտրատարածքից ընտրված պատգամավորը խորհրդարանում Արմեն Կարապետյանն է (լուսանկարում) , եւ հենց նրան էլ մատնացույց էր անում դահլիճում Զարուհի Փոստանջյանը, ուստի ելույթից հետո Արմեն Կարապետյանը խնդրեց միացնել իր խոսափողը, որ արձագանքի ու մեկնաբանի, բայց նիստը վարող Էդուարդ Շարմազանովը թույլ չտվեց՝ հորդորելով հետո ելույթում արձագանքել:
Ինքը՝ պարոն Շարմազանովն արձագանքեց Զարուհի Փոստանջյանի այն քննադատությանը, որ ԱԺ-ում դատարկ տարածք է: Նրա խոսքերով՝ դատարկությունը ձեր շարքերում է, իսկ խորհրդարանում ազգընտիր պատգամավորներ են. «Ինչ վերաբերում է ձեր միտինգներին, ես ձեզ կխնդրեի էլ միտինգ չանել, որովհետեւ ձեր ելույթն այստեղ դահլիճում ավելի շատ մարդ լսեց, քան թե օպերայի տարածքում դուք հավաքվում եք»:
Հռիփսիմե ՋԵԲԵՋՅԱՆ
