«Մի բան պետք է հասկանաք, որ եթե բանակցում են սեղանի շուրջ, չեն բանակցում առաջին գծում: Եթե չեն բանակցում սեղանի շուրջ` բանակցությունները տեղափոխվում են առաջին գիծ: Այդ նույն կրակոցները դրանք բանակցությունների մի ձև է»,- խորհրդարանում լրագրողների հետ զրույցում վերլուծելով շաբաթ օրը կայացած Սերժ Սարգսյան-Իլհամ Ալիեւ հանդիպման արդյունավետությունն, ասաց ԱԺ արտաքին հարաբերությունների հանձնաժողովի անդամ, «Ժառանգություն» խմբակցության պատգամավոր Թեւան Պողոսյանը:
Պատգամավորի կարծիքով, տրամաբանությունը հուշում է` որքան շատ լինեն հանդիպումները, այնքան շատ կլինեն դրական տեղաշարժերը: Բայց նա նաեւ արձանագրում է. «Փաստորեն ևս մեկ անգամ ապացուցվեց, որ անպտուղ հանդիպում էր այն իմաստով, որ թեթև հույսեր հայտնելու հայտարարություններ էին, որ ինչ լավ է, որ նախագահները համաձայնվել են շարունակել աշխատանքները միջադեպեր քննման վերաբերյալ չնայած, ոնց որ բոլորը գիտեն թե ինչ մեխանիզմներ պետք է օգտագործեն»:
Թեւան Պողոսյանը նկատեց, որ հանդիպումից հետո ՀՀ ԱԳ նախարար Էդվարդ Նալբանդյանը բավական անհուսալի էր գնահատել ադրբեջանական կողմի քաղաքականության փոփոխությունը: Նաեւ սա է իրեն հիմք տալիս ասել` քանի դեռ Ադրբեջանը չի փոխելու իր մարտավարությունը՝ սահմանը լարված պահելու առումով, Հայաստանը պետք է հզորացնի իր բանակն ու դրանով իսկ հասկացնի Ադրբեջանին, որ ռազմական քայլերով խնդիր լուծել չեն կարող. «Մինսկի խումբը պետք է հասկանա, որ սրանից հետո այլևս ժամանակ չկա փափուկ կեցվածքի, որ երկու կողմերի, երեք կողմերի միջև հավասարության նշան պահելն այլևս անընդունելի է»:
Նելլի ԳՐԻԳՈՐՅԱՆ
