Այս պահին Ազատության հրապարակում կրկին մեկնարկեց «Նոր Հայաստանի» տեղեկատվական հավաքը: Հիմնադիր խորհրդարանի անդամ Վարուժան Ավետիսյանը ներկայացրեց «Նոր Հայաստանի» անդամների՝ մարզերում անցկացրած երթի որոշ մանրամասներ:
Ըստ Ավետիսյանի, «Նոր Հայաստան» ճակատի ներկայացուցիչները եղել են Աբովյան, Հրազդան քաղաքներում, ինչպես նաեւ Գավառում եւ Մարտունիում, իսկ այս պահին ուղեւորվում են Իջեւան: Ավետիսյանն ասաց, որ այսօրվա երթը համեմատաբար հանգիստ է անցել. «Չհաշված այն մանր-մունր սրիկայությունները, որոնք ամենուր տեղի են ունենում: Աբովյանում մի խումբ «ծաղիկներ»՝ պայմանական ասած, մի խումբ կանայք փորձել են խանգարել հավաքը, հետո շարժվել դեպի ՀՀԿ գրասենյակի շենք, եւ այդպիսով ակնհայտ դարձել նրանց կապը ՀՀԿ-ի հետ»:
Ավետիսյանի խոսքերով՝ Հրազդանում, նույնպես, մի խումբ կանայք նմանատիպ գործողություններ են արել, եւ հետո պարզվել է նրանց կապը Կոտայքի մարզպետարանի հետ, իսկ Գավառում նման դեպքեր չեն արձանագրվել: «Մարտունիում ոստիկանները շարժվել են երթի առջեւից եւ քաղաքացիներին հորդորել են շենքերից ներս անցնել, կամ ներս մտնել խանութներ, փորձել են թույլ չտալ մարդկանց շփվել երթի մասնակիցների հետ»,-նշեց Հիմնադիր խորհրդարանի անդամը:
Վարուժան Ավետիսյանը նաեւ տեղեկացրեց, որ այսօրվա երթից առավել մանրամասն կներկայացվի վաղը, կրկին Ազատության հրապարակում հանդիպման ժամանակ, ժամը 17.00-ին: «Նոր Հայաստանի» մարզային վաղվա երթուղին կմեկնարկի Աշտարակից, ապա երթը շարժվելու է Ապարան, Սպիտակ, Վանաձոր եւ եզրափակվելու է Գյումրի քաղաքում:
Կարդացեք նաև
Նրանք, ովքեր ցանկանում են մասնակցել մարզային երթին, Ավետիսյանը տեղեկացրեց, որ շարժվելու են առավոտյան ժամը 9.50 րոպեին, Երզնկյան 75 հասցեից: Իսկ դեկտեմբերի 22-ին, ինչպես ասաց Ավետիսյանը, «Ազատության» հրապարակում ժամը 17.00-ին «Նոր Հայաստանը» կամփոփի մարզային այցելությունները»:
Նելլի ԲԱԲԱՅԱՆ
