Քիչ առաջ Սահմանադրական դատարանի աշխատակազմի ղեկավար Առուշան Հակոբյանը հրաժարվեց ընդունել ԱԺ տասնինը պատգամավորների, ՀԱԿ խմբակցության ղեկավար Լևոն Զուրաբյանի, չորս ՀԿ-ների կողմից դիտորդական առաքելություն իրականացրած մի խումբ դիտորդների, ԶԼՄ-ների և մի խումբ քաղաքացիների կողմից ՍԴ-ին հասցեագրված դիմումները` դեկտեմբերի 6-ի սահմանադրական փոփոխությունների հանրաքվեն անվավեր ճանաչելու մասին, որոնք ՍԴ էր բերել փաստաբան Տիգրան Եգորյանը:
Առուշան Հակոբյանը հրաժարվեց ընդունել դիմումը՝ հղում կատարելով Սահմանադրության 101-րդ և ՍԴ-ի մասին 63-րդ հոդվածին: Նա պնդեց, որ պարոն Եգորյանը սուբյեկտ չէ ու մանրամասնեց. «Դիմումը պաշտոնապես պետք է ուղարկի ԱԺ նախագահը»:
Պարոն Եգորյանը նշեց, թե ինքը միայն պատգամավորների կողմից դիմում չի բերել, այլև քաղաքացիների, սակայն Առուշան Հակոբյանն ասաց, թե աշխատանքային ժամն արդեն ավարտված է:
Կարդացեք նաև
Նշենք, որ Տիգրան Եգորյանը ՍԴ-ում էր 17.40, սակայն ընդունարանը փակ էր: Անվտանգության աշխատակիցները փորձում էին համոզել, որ ընդունարանում աշխատողներ կան, այնուհետև ներքև իջավ Առուշան Հակոբյանը և շուրջ 20 րոպե նույնն բանն էր կրկնում, թե Տիգրան Եգորյանը սուբյեկտ չէ ՍԴ դիմում ներկայացնելու համար: Այնուհետև ժամը 18.00-ին լքեց ՍԴ շենքը: Այդպես էլ ոչ ոք չընդունեց Տիգրան Եգորյանի բերած դիմումները:
Տաթև ՀԱՐՈՒԹՅՈՒՆՅԱՆ
