«Թե ինչքանով է իրականությունը համապատասխանում Հրանտ Մաթևոսյանի երազած հայրենիքին, մենք ու դուք ենք տեսնում: Ինչքան էլ նրա տեսլականը թվա գրողի, մտավորականի, հումանիտարի մտածելակերպ, կարծում եմ, որ այն միանգամայն ճշգրիտ, լավ մտածված, առողջ և հստակ տեսլական է: Հասկացողը թող հասկանա… Այդ տեսլականով երկիրն ունի գոյության իրավունք, մարտահրավերներին դիմակայելու ու առաջ ընթանալու հնարավորություն: Դրան պետք է ձգտել ամեն օր, որովհետև մշակույթը հայրենիք է ստեղծում, երկիրը դարձնում է երկիր ու պետություն: Մենք դրան պետք է ձգտենք»,- ասում է Հրանտ Մաթևոսյանի որդին՝ «Հրանտ Մաթևոսյան» մշակութային բարեգործական հիմնադրամի տնօրեն Դավիթ Մաթևոսյանը:
Դեկտեմբերի 18-ը գրողի մահվան օրն է: Այդ առթիվ մտերիմներն ու հարազատներն այսօր այցելել էին Կոմիտասի անվան պանթեոն՝ Հրանտ Մաթևոսյանի շիրիմին:
«Մենք ուխտ ունենք դեպի լույսը»,- ասում էր Հրանտ Մաթևոսյանը՝ իր երազներում փայփայելով լուսավոր Հայաստանի տեսլականը:
Գրողների միության նախագահ Էդվարդ Միլիտոնյանի համոզմամբ՝ որևէ գրողի երազն ու իրականությունը չափազանց անհամատեղելի են. «Երազը ցանկությունների ոլորտն է, իրականությունը միշտ դժվար է լինում: Րաֆֆու պարագայում ասենք, Բակունցի, Չարենցի, մեր մյուս մեծերի… Երբեք չես կարող համեմատել»,- ասում է Է. Միլիտոնյանը:
Կարդացեք նաև
Ի դեպ, Դավիթ Մաթևոսյանը տեղեկացրեց նաև, որ երեկ մշակույթի նախարարության հետ պայմանագիր են կնքել Մաթևոսյանի անտիպ գործերի մի մասի հրատարակման ֆինանսավորման վերաբերյալ. «Իսկ երկրորդ մասին կանցնենք եկող տարվա մեջ: Հույս ունեմ՝ մյուս տարվա առաջին կիսամյակի ընթացքում այդ գործերը լույս կընծայվեն երկու հատորով»,- ասաց Դ. Մաթևոսյանը:
Սիրանուշ ՀԱՅՐԱՊԵՏՅԱՆ
