Հայաստանի խորհրդանիշերը փոխել-չփոխելու հարցն այսօր արվեստագետների քննարկման թեման էր «Հայելի» ակումբում:
«Ժամանակին, երբ ընդունվում էին մեր խորհրդանիշերը, կարծիքները տարբեր էին, ըստ երեւույթին քաղաքական որոշում կայացվեց այդ հարցում, հաշվի չնստեցին մասնագետների կարծիքների հետ թե՛ գերբի, թե՛ հիմնի, թե՛ դրոշի խնդրում: Մեզ առավել եւս պետք է սրտացավ լինել այդ հարցում: Պետք է այնպիսի խորհրդանիշեր լինեին, որ ժամանակակից եւ հեշտ ընկալելի լինեին»,- ասաց նկարիչ Հաղթանակ Շահումյանը:
Նրա խոսքով, մեր գերբը իր բնույթով հայկական չէ, եվրոպական, ռուսական գերբերի ազդեցությամբ է արվել. «Մասնակի փոփոխություններին դեմ եմ, պետք է հիմնովին նոր գերբ արվի, եթե արվում է, որովհետեւ մասնակի փոփոխության դեպքում էլ նույն ծախսերն են արվելու, պարզապես մասնակի փոփոխությունները ոչինչ չեն տա»:
Ինչպիսին պետք է լինի նոր գերբը, Հաղթանակ Շահումյանը դժվարանում է ասել. «Այն ինչ պետք է գծվի ու ներկայացվի կարժեզկվի բառերով ներկայացնելիս»:
Կարդացեք նաև
Երգիչ Արտավազդ Բայաթյանն էլ երեք խորհրդանիշերն էլ չստացված է համարում: «Չասենք թյուրիմացություն է: Օրհներգը պետք է լինի տոնական ու հանդիսավոր, բայց մերը անկումային է: Նույնը նաեւ տեքստի մասին եմ ասում, բայց մեր օրհներգը, կարծես գրագողություն լինի: Գլազունովի Ռայմոնդա բալետից է նույն ձեւով վերցված: Մեր գերբն էլ սիմետրիկ չէ, մեր երկու խորհրդանիշերը՝ առյուծն ու արծիվը, երկուսի հայացքն էլ դուրս են նայում, աչքը դուրսն է»,- կատակեց երգիչը:
Վերջում էլ հավելեց՝ ինչու մեր խորհրդանիշերում Մասիս չլինի, դա մեր հավերժական խորհրդանիշն է, կամ ինչու դրոշը կարմիրից է սկսում, իր համար կրկին անհասկանալի է:
Արփինե ՍԻՄՈՆՅԱՆ
